मिसिंग लिंक दुर्घटना: तब्बल १४ तासानंतर दरड हटविण्यात यश; मात्र तूर्तास एक मार्गिका बंदच, सुरक्षा आणि तांत्रिक तपासणीनंतरच मार्गिका सेवेत, एमएसआरडीसीचा निर्णय

सोमवारी पहाटे तीनच्या सुमारास दरड कोसळली. दरडीचा भाग पुलावर कोसळलाच पण बोगद्याची कमाणही कोसळली. या घटनेची माहिती मिळताच एमएसआरडीसीच्या पथकाने मिसिंग लिंक पूर्ण बंद करून दरड हटविण्याचे काम हाती घेतले. महामार्गावर अडकलेली वाहने लक्षात घेता मुंबईहून पुण्याला जाणारी मार्गिका सकाळी नऊच्या सुमारास वाहतुकीसाठी खुली करण्यात आली. तर दुसरीकडे दरड हटविण्याचे काम सुरु होते. हे काम पाच तासात पूर्ण होईल असे एमएसआरडीसीकडून सकाळी नऊ वाजता सांगण्यात आले होते. मात्र पावसाचा मारा, कमाणीचा भाग फोडून काढणे अवघड ठरत असल्याने या कामासाठी वेळ लागत होता. शेवटी सायंकाळी साडे पाचच्या सुमारास दरड हटविण्यात एमएसआरडीसीच्या पथकाला यश आले. दरड हटविल्यानंतर मार्गिका वाहतूक सेवेत दाखल होईल असे वाटत होते. मात्र सुरक्षिततेच्या कारणाने एमएसआरडीसीने ही मार्गिका बंदच ठेवण्याच निर्णय घेतला. तशी माहिती समाज माध्यमाद्वारे देण्यात आली.

पुण्याहून मुंबईला जाणार्या मार्गिकेची संपूर्ण सुरक्षा तसापणी,तांत्रिक तपासणी केल्यानंतर आणि या तपासणीत मार्गिका वाहतुकीसाठी सुरक्षित असल्याचे खात्री झाल्यानंतरच मार्गिका वाहतूक सेवेत दाख केली जाणार असल्याचे एमएसआरडीसीने स्पष्ट केले. पावसामुळे ही तपासणी करण्यास अडथळे येत आहेत, त्यामुळे या तपासणीसाठी किती वेळ लागणार हे आताच सांगता येणार नसल्याचेही अधिकार्यांनी सांगितले. त्यामुळे एक मार्गिका बंद असून ही मार्गिका केव्हा सुरु होते हे पाहणे महत्त्वाचे ठरेल. दरम्यान प्रवाशांनी, नागरिकांनी गरज असेल तरच पुढील काही दिवस मुंबई-पुणे प्रवास करावा असे आवाहनही एमएसआरडीसीने केले आहे.