गोवंडी-चेंबूरदरम्यान प्रवाशाला ठार मारण्याची धमकी; प्रसारित ध्वनिचित्रफितीच्या आधारे आरोपीला रेल्वे पोलिसांकडून अटक

हार्बर मार्गावरील गोवंडी – चेंबूरदरम्यान डाऊन दिशेने जाणाऱ्या सीएसएमटी धीम्या लोकलमध्ये नुकतीच ही घटना घडली. प्रवासी सुरेंद्र शुक्ला (५५) यांना कुरेशीने आरडाओरडा करत ठार मारण्याची धमकी दिली. ‘मी अनेक खून केले आहेत’, अशी धमकी देऊन प्रवाशाला घाबरवण्याचा त्याने प्रयत्न केला. घटनेचे गांभीर्य लक्षात घेऊन लोकमान्य टिळक टर्मिनस रेल्वे पोलीस ठाण्याच्या गुन्हे प्रकटीकरण पथकाने तातडीने तपास सुरू केला. ध्वनिचित्रफितीचे तांत्रिक विश्लेषण, विविध रेल्वे स्थानकांवरील सीसी टीव्ही कॅमेऱ्यांतील चित्रीकरणाची तपासणी; तसेच गोपनीय माहितीच्या आधारे आरोपीचा माग काढण्यात आला. त्यानंतर रे रोड रेल्वे स्थानकाबाहेरून आरोपीला ताब्यात घेण्यात आले.

प्रवाशांच्या सुरक्षिततेबाबत कोणतीही तडजोड केली जाणार नाही, असा स्पष्ट संदेश रेल्वे पोलिसांनी या कारवाईतून दिला. रेल्वे प्रवाशांच्या सुरक्षिततेला धोका निर्माण करणाऱ्या कोणत्याही व्यक्तीविरुद्ध कठोर कायदेशीर कारवाई करण्यात येईल. तसेच रेल्वे प्रवासादरम्यान कोणतीही अनुचित अथवा संशयास्पद घटना आढळल्यास नागरिकांनी तात्काळ रेल्वे पोलीस किंवा मदतवाहिनी क्रमांक १५१२ वर माहिती द्यावी, असे आवाहन मुंबई लोहमार्ग पोलीस आयुक्तालयाने केले आहे.

पश्चिम रेल्वेवरील अंधेरी – बोरिवलीदरम्यान धावणाऱ्या लोकलच्या प्रथम श्रेणी डब्यात दरवाजा बंद ठेवण्याच्या किरकोळ वादातून मयंक लोहार (२२) याची चाकूने भोसकून हत्या करण्यात आली होती. या प्रकरणात आरोपी रोशन सुवर्णा याला अटक करण्यात आली. या घटनेनंतर रेल्वे पोलिसांनी सुरक्षात्मक कार्यवाही करण्यास सुरुवात केली आहे.

सकाळी आणि सायंकाळी प्रवाशांच्या बॅगची तपासणी, सुरक्षा पाहणी दौरे, गर्दीचे नियोजन आदी उपाययोजना करण्यात येत आहे. तसेच समाज माध्यमावर प्रसारित होणाऱ्या रेल्वे प्रवासासंदर्भातील हिंसक ध्वनिचित्रफितीवर विशेष लक्ष केंद्रीत केले आहे. प्रवाशांना इजा होईल, प्रवाशांना धमकी देणारे, शिवीगाळ करणारे किंवा महिलांची सुरक्षा धोक्यात येणाऱ्या ध्वनिचित्रफिती पडताळून, त्याबाबत कठोर कारवाई केली जात आहे.