कोणतेही प्रतिकूल आदेश नाहीत; मुसळधार पावसाच्या पार्श्वभूमीवर उच्च न्यायालयाचा निर्णय

भारतीय हवामान विभागाने सोमवारी मुंबई, ठाणे आणि रायगड जिल्ह्यांसाठी ”रेड अलर्ट” प्रसिद्ध केला. यात जोरदार वारे आणि मुसळधार ते अति मुसळधार पावसाचा अंदाज वर्तवण्यात आला असून, नागरिकांना विनाकारण प्रवास टाळण्याचे आवाहन करण्यात आले. मुसळधार पावसामुळे सखल आणि शहरी भागांत पाणी साचू शकते. तसेच अचानक पूरसदृश्य परिस्थिती निर्माण होऊ शकते, असा इशाराही हवामान विभागाने दिला.

या पार्श्वभूमीवर, मुसळधार पावसामुळे वकीलवर्ग न्यायालयात उपस्थित राहू न शकल्यास त्यांच्या प्रकरणांमध्ये कोणतेही प्रतिकूल किंवा त्यांची याचिका फेटाळण्याचे आदेश दिले जाणार नाहीत, अशी ग्वाही प्रभारी मुख्य न्यायमूर्ती रवींद्र घुगे यांनी सोमवारी वकील संघटनांना दिली. मुंबईतील उच्च न्यायालयाच्या इतर सर्व खंडपीठांकडूनही या आश्वासनाचे पालन केले जाईल, असे न्यायालयाने स्पष्ट केले.