मुंबई : मुंबई विद्यापीठाच्या रसायनशास्त्र विभागात पॉलिमर रसायनशास्त्र संशोधन प्रयोगशाळा सुरू करण्यात आली आहे. त्यामुळे पॉलिमर, बॅटरी मटेरियल्स आणि अनुप्रयुक्त विज्ञान क्षेत्रातील संशोधनाला नवचैतन्य मिळणार असून उद्योग आणि शैक्षणिक क्षेत्रातील सहकार्य वृद्धिंगत होण्यास मदत होणार आहे. मुंबई विद्यापीठात प्रथमच सामाजिक उत्तरदायित्व (सीएसआर) निधीतून प्रयोगशाळेचे काम करण्यात आले आहे.
मुंबई विद्यापीठात सुरू करण्यात आलेल्या पॉलिमर संशोधन प्रयोगशाळेमुळे रसायनशास्त्र विभागाची संशोधन क्षमता वाढून पॉलिमर संशोधन, स्मार्ट कोटिंग्ज, बॅटरी आणि नॅनोमटेरियल्स या क्षेत्रांतील अद्ययावत संशोधन करण्यास मदत होणार आहे. सीएसआर सहाय्याने झालेली ही प्रयोगशाळा विद्यापीठासाठी एक महत्त्वपूर्ण टप्पा ठरणार आहे. अशा उपक्रमांमुळे वैज्ञानिक क्षमतेत वृद्धी होऊन शैक्षणिक संशोधन व औद्योगिक गरजा यात समन्वय साधला जाणार असून या प्रयोगशाळेमुळे संशोधकांना प्रेरणा मिळेल तसेच शाश्वत विकासासाठी मोलाचे योगदान मिळू शकेल, असा आशावाद मुंबई विद्यापीठाचे कुलगुरू प्रा. रवींद्र कुलकर्णी यांनी व्यक्त केला.
ही प्रयोगशाळा युरोफिन्स ॲनालिटिकल सर्व्हिसेस इंडिया प्रायव्हेट लिमिटेड या संस्थेच्या सीएसआर प्रकल्पांतर्गत साकारण्यात आली आहे. या प्रयोगशाळेचे उद्घाटन मुंबई विद्यापीठाचे कुलगुरू प्रा. रवींद्र कुलकर्णी आणि युरोफिन्स ॲनालिटिकल सर्व्हिसेस इंडिया प्रा. लिमिटेडचे व्यवस्थापकीय संचालक डॉ. पंकज जैमिनी यांच्या हस्ते करण्यात आले. यावेळी विज्ञान आणि तंत्रज्ञान विद्याशाखेचे अधिष्ठाता प्रा. शिवराम गर्जे, सहाय्यक संचालक डॉ. शिल्पा बाले, युरोफिन्स, रसायनशास्त्र विभागाचे विभागप्रमुख प्रा. नवीनचंद्र शिंपी, प्रा. विश्वनाथ पाटील यांच्यासह विविध मान्यवर उपस्थित होते.
