आरोग्य विज्ञान अभ्यासक्रमांचे प्रवेश ‘नीट’च्या गुणांआधारेच

राज्य सामायिक प्रवेश परीक्षा विभागाचे स्पष्टीकरण

राज्य सामायिक प्रवेश परीक्षा विभागाचे स्पष्टीकरण

शैक्षणिक वर्ष २०१७-१८साठी राज्यात एमबीबीएस व दंतवैद्यकीयप्रमाणेच इतर आरोग्य विज्ञान अभ्यासक्रमांचे प्रवेशही ‘राष्ट्रीय पात्रता व प्रवेश परीक्षा’ (नीट)च्या गुणांच्या आधारे होणार असल्याचे राज्य सामायिक प्रवेश परीक्षा विभागाने स्पष्ट केले. यामुळे आरोग्य विज्ञान शाखांना प्रवेश घेणाऱ्या विद्यार्थ्यांचा संभ्रम दूर झाला आहे.

३ डिसेंबर २०१५च्या राजपत्रानुसार एमबीबीएस, बीडीएस, बीएएमएस, बीयूएमएस, बीएचएमएस, बीपीटीएच, बीओटीएच, बीएस्सी (नर्सिग), बीएएसएलपी आणि बीपी अँड ओ या अभ्यासक्रमांना व्यावसायिक आरोग्य विज्ञान अभ्यासक्रमांचा दर्जा देण्यात आला आहे. या अभ्यासक्रमांसाठीची प्रवेश प्रक्रिया केंद्र सरकारने व राज्य सरकारने वेळोवेळी जाहीर केलेल्या धोरणांनुसार करण्यात येत असल्याचे राज्य प्रवेश परीक्षा विभागाने स्पष्ट केले.

आरोग्य विज्ञानाशी संबंधित या अभ्यासक्रमांचे प्रवेश ‘नीट’नुसार व्हावेत अशी मागणी वैद्यकीय शिक्षण संचालनालयातर्फे एक महिन्यापूर्वीच राज्य सरकारकडे करण्यात आली होती. त्यानुसार हा निर्णय घेण्यात आला आहे.

आयआयटीतून ६२५ विद्यार्थ्यांना नोकऱ्या

मुंबई : आयआयटी मुंबईत सुरू असलेल्या प्लेसमेंट हंगामात पहिल्या पाच दिवसांमध्ये ६२५ हून अधिक विद्यार्थ्यांना नोकऱ्या देण्यात आल्या आहेत. ही भरतीय प्रक्रिया १५ डिसेंबपर्यंत सुरू राहणार आहे. यंदाच्या भरती प्रक्रियेत नोकऱ्या मिळत असल्या तरी त्यांना मिळणाऱ्या पगाराचा आकडा हा दरवर्षीच्या तुलनेत खूपच कमी असल्याचे सूत्रांकडून समजते.

यंदा आयआयटीमध्ये बहुराष्ट्रीय कंपन्यांबरोबरच सार्वजनिक क्षेत्रातील कंपन्या सहभागी झाल्या आहेत.  यंदा जपानमधील कंपन्यांची संख्याही वाढल्याचे आयआयटीतर्फे स्पष्ट करण्यात आले आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व मुंबई बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Neet exam health science courses