मुंबईः न्यू इंडिया को-ऑपरेटिव्ह बँक अपहारप्रकरणी ४५ कोटी रुपये परदेशात हस्तांतरित करण्यात आल्याचे काही पुरावे सक्तवसुली संचलनालयाच्या (ईडी) हाती लागले आहेत. ईडीने याप्रकरणी मुंबई व गुजरातमधील सात ठिकाणी छापे टाकले. या कारवाईत महत्त्वाचे दस्तऐवज, मालमत्ता संबंधित कागदपत्रे, तसेच सुमारे १ कोटी रुपयांच्या मौल्यवान वस्तू व रोख रक्कम सापडली असून ते जप्त करण्यात आले.छाप्यात याप्रकरणातील महत्त्वाचे पुरावे ईडीच्या हाती लागले आहेत.
बँकेच्या बुडीत कर्ज खात्यांमधून रक्कम परदेशातील संस्था व कंपन्यांमध्ये वळवण्यात आल्याचे उघड झाले आहे. हे व्यवहार बँकेचे माजी अध्यक्ष हिरन भानू यांच्याशी संबंधित असल्याचा ईडीला संशय आहे. या संदर्भात सापडलेल्या कागदपत्रानुसार हे व्यवहार ४५ कोटी रुपयांपेक्षा अधिक रकमेचे असून त्याबाबत ईडीने सखोल चौकशी सुरू केली आहे.
बँकेचे प्रभारी मुख्य कार्यकारी अधिकारी देवर्षी घोष यांच्या तक्रारीवरून दादर पोलिसांनी भारतीय न्याय संहिता कलम ३१६ (५), ६१ (२) अंतर्गत गुन्हा दाखल केला होता.१२२ कोटी रुपयांच्या अपहाराचे हे प्रकरण पुढे मुंबई पोलिसांच्या आर्थिक गुन्हे शाखेला वर्ग करण्यात आले होते. त्याच्याच आधारावर ईडी याप्रकरणी तपास करीत आहे. याप्रकरणी आर्थिक गुन्हे शाखेने बँकेचा महाव्यवस्थापक हितेश मेहताला अटक केली. मेहताकडून मिळालेल्या माहितीच्या आधारे बांधकाम व्यावसायिक धर्मेश पौन याला पोलिसांनी अटक केली. याशिवाय या प्रकरणात बँकेचा तत्कालीन सीईओ अभिमन्यू भोअन याला अटक करण्यात आली. नुकतीच याप्रकरणी चौथा आरोपी मनोहर अरूणाचलम, कपिल देढिया व उन्ननाथन अरूणाचलम यांना अटक करण्यात आली. याशिवाय याप्रकरणातील हिरेन भानू, गौरी भानू सध्या परदेशात असल्याचे समजते.
बुडीत खात्यांप्रकरणी तपास सुरू
न्यू इंडिया को ऑप बँकेच्या १२२ कोटींच्या आपहारासोबत बुडीत कर्जाची चौकशी आर्थिक गुन्हे शाखेकडून सुरू आहे. याच प्रकरणात आर्थिक गुन्हे शाखेच्या मागणीनंतर बँकेने २०१० पासून बुडीत कर्ज खात्यांची माहिती आर्थिक गुन्हे शाखेला सुपूर्त केली होती. यामध्ये एका अभिनेत्रीने घेतलेल्या कर्ज खात्याचाही समावेश आहे. मात्र, त्यांना ७३ लाखांची सवलत देत त्यांची कर्जाची रक्कम वसूल करण्यात आल्याचे बँकेच्या माहितीतून उघड झाले आहे. आर्थिक गुन्हे शाखेच्या अधिकाऱ्याने दिलेल्या माहितीनुसार, कर्ज देतानाही नियमांचे उल्लघन करून लाच घेत जवळपास ४०० कोटींचे कर्ज मंजूर केल्याच्या लेखी अर्जावरून चौकशी सुरू आहे.
आरबीआयने बँकेवर दंडात्मक कारवाई केल्याची माहिती समोर येत आहे. याबाबत स्वतंत्र चौकशी सुरू आहे. सीईओ देवर्षी घोष यांना या माहितीसह बोलवण्यात आले आहे. त्यानुसार, त्यांनी जवळपास २०१० पासूनचे नोंदी असलेल्या पुस्तिका आर्थिक गुन्हे शाखेकडे सादर केल्या होत्या. या फाईलची आर्थिक गुन्हे शाखेच्या फॉरेन्सिक ऑडिटरकडून तपासणी सुरू आहे. यामध्ये अभिनेत्रीच्या फाईलचा समावेश आहे.
अभिनेत्रीलाही कर्जात सवलत
हिंदी चित्रपटसृष्टीतील एका अभिनेत्रीलाही ७ जानेवारी २०११ मध्ये १८ कोटींचे कर्ज मंजूर करण्यात आले होते. ३१ मार्च २०१३ ला कर्जाची परतफेड न झाल्याने खाते बुडीत करण्यात आले. जवळपास ११ कोटी ४७ लाखांची रक्कम थकीत होती. ५ एप्रिल २०१४ मध्ये तडजोडीअंती ७३ लाखांची सूट दिल्यानंतर अभिनेत्रीने १० कोटी ७४ लाख रुपये भरल्याचे कागदोपत्री नोंदीतून निदर्शनास असल्याचे सूत्रांनी सांगितले.
