नितीन देसाईंच्या एनडी स्टुडिओच्या नूतनीकरणासाठी सरकारचे १३ कोटी

कला दिग्दर्शक नितीन देसाई यांच्या निधनानंतर सरकारने नोव्हेंबर २०२४मध्ये या चित्रनगरीची जबाबदारी स्वीकारली. सप्टेंबर २०२५ पासून ही चित्रनगरी सरकारच्या अधिपत्याखाली आली आहे. महाराष्ट्र चित्रपट, रंगभूमी आणि सांस्कृतिक विकास महामंडळ, गोरेगाव यांच्याकडून चित्रनगरीतील नूतनीकरणासंदर्भातची मागणी सरकारकडे करण्यात आली होती. त्यानुसार अंतर्गत निवास व्यवस्थेतील १०० खोल्यांचे नूतनीकरण, वार्षिक देखभाल व संरचनात्मक लेखापरीक्षासाठी १३.०३ कोटींचा खर्चाला वित्त विभागाने मान्यता दिली आहे.

स्वर्गीय कलादिग्दर्शक नितीन देसाई यांच्याकडून कर्जतमध्ये ४६ एकरांवर ही चित्रनगरी उभारण्यात आली आहे. जोधा अकबर, बाजीराव मस्तानी, प्रेम रतन धन पायो अशा अनेक चित्रपटांचे चित्रीकरण या चित्रनगरीत झाले आहे. शिशमहल, खेडेगाव, परदेशी पर्यटन स्थळांचे देखावे, चित्रपट संग्रहालय या चित्रनगरीत उभारण्यात आले आहे. यामधये १०० निवासी खोल्या आणि छोटेखानी बंगले असून या चित्रनगरीच्या नूतनीकरणासाठी सरकारकडून विकास आराखडा तयार करण्यात येत आहे. या चित्रनगरीचा कारभार पाहण्यासाठी सहाय्यक लेखाधिकारी, प्रशासकीय अधिकारी आणि मुख्य कार्यकारी अधिकारी अशी तीन पदे नियुक्त करण्यात आली आहेत.

सध्या या ठिकाणी काही चित्रपटांचे चित्रीकरण सुरू करण्यात आले असून विवाहपूर्व चित्रीकरणासाठी ही चित्रनगरी सध्या आवडेत ठिकाण झाले आहे. त्याचप्रमाणे विविध समारंभासाठीही भाडेतत्त्वावर सभागृह तसेच निवासी खोल्या उपलब्ध करून दिल्या जात आहेत. याच पार्श्वभूमीवर येथील खोल्या तसेच अन्य वास्तूंच्या नूतनीकरणाची आवश्यकता निर्माण झाली असून त्यासाठी वित्त विभागाकडून १३ कोटींचा निधी मंजूर करण्यात आला आहे. याबरोबरच टप्प्या टप्प्याने संपूर्ण चित्रनगरीचेच नूतनीकरण करण्यात येणार आहे.