मुंबई : पनवेल येथे आंतरराष्ट्रीय दर्जाचा प्रस्तावित ‘ मत्स्यालय व समुद्री सिंह मनोरंजन केंद्र’ उभारण्यासाठी सखोल अभ्यास करून सुस्पष्ट व व्यवहार्य आराखडा तयार करावा. १० एकर परिसरात हे केंद्र उभारण्यात येणार असून हा प्रकल्प देश-विदेशातील पर्यटकांना आकर्षित करणारे असावे, असे निर्देश मत्स्यव्यवसाय व बंदरे मंत्री नितेश राणे यांनी दिले.
या प्रकल्पासंदर्भात मंत्रालयात मत्स्यव्यवसाय मंत्री राणे यांच्या अध्यक्षतेखाली बैठक झाली. बैठकीत आमदार विक्रांत पाटील यांनी प्रकल्पाबाबत सविस्तर निवेदन सादर केले. पनवेल येथील डॉ. बाळासाहेब सावंत कोकण कृषी विद्यापीठ, दापोली अंतर्गत असलेले मत्स्य उपकेंद्र समुद्रमुखाजवळ स्थित असून सागरी व अंतर्जल परिसंस्थेच्या विकासासाठी अत्यंत उपयुक्त आहे. या ठिकाणी सुमारे १० एकर क्षेत्रावर ‘स्कायला मत्स्यालय व समुद्री सिंह मनोरंजन केंद्र’ उभारण्याचा प्रस्ताव आहे. प्रकल्पामध्ये जागतिक दर्जाचे सागरी व गोड्या पाण्यातील जीवसृष्टी प्रदर्शन तसेच सी लायन शोसारखे आकर्षक उपक्रम समाविष्ट करण्याची संकल्पना मांडण्यात आली आहे.
पनवेल हे आंतरराष्ट्रीय विमानतळाच्या जवळ असल्यामुळे या प्रकल्पाद्वारे देश-विदेशातील पर्यटकांना मोठ्या प्रमाणात आकर्षित करता येईल. तसेच पर्यावरण संवर्धन, जैवविविधतेचा अभ्यास आणि शैक्षणिक मूल्यवर्धनासाठीही हा प्रकल्प उपयुक्त ठरणार असल्याचे मत्स्यव्यवसाय मंत्री राणे यांनी सांगितले. बैठकीला मत्स्यव्यवसाय विभागाच्या आयुक्त प्रेरणा देशभ्रतार, महाराष्ट्र मत्स्यउद्योग महामंडळाचे व्यवस्थापकीय संचालक प्रकाश खपले, पनवेल महानगरपालिकेचे आयुक्त मंगेश चितळे तसेच संबंधित अधिकारी उपस्थित होते.
