पंकजा मुंडेच्या पीएला अखेर जामीन मंजूर, सत्र न्यायालयाचा निर्णय

आपल्यावरील आरोप अस्पष्ट असून, आपल्यावरील कारवाई ही दुर्दैवी घटनेनंतरच्या भावनिक तणावाचा परिणाम असल्याचा दावा गर्जे याने जामिनाची मागणी करताना केला होता. गर्जे याची पत्नी डॉ. गौरी पालवे (२८) या महापालिकेच्या केईएम रुग्णालयात दंतवैद्य म्हणून कार्यरत होत्या. त्यांनी गेल्या वर्षी २२ नोव्हेंबर रोजी मध्य मुंबईतील वरळी येथील त्यांच्या निवासस्थानी आत्महत्या केली होती.

गौरी आणि गर्जे यांचे गेल्या वर्षी फेब्रुवारीमध्ये लग्न झाले होते. तथापि, गौरी यांच्या मृत्यूनंतर त्यांच्या वडिलांनी केलेल्या तक्रारीवरून वरळी पोलिसांनी गर्जे, त्याचा भाऊ आणि बहीण यांच्याविरुद्ध आत्महत्येस प्रवृत्त केल्याच्या आरोपाप्रकरणी गुन्हा दाखल केला होता. गर्जे याची बहीण शीतल गर्जे-अंधाळे आणि भाऊ अजय गर्जे यांना कनिष्ठ न्यायालयाने याआधीच अटकपूर्व जामीन मंजूर केला होता. त्या पार्श्वभूमीवर गर्जे याने जामिनासाठी सत्र न्यायालयात अर्ज केला होता. अतिरिक्त सत्र न्यायाधीश रूपाली पवार यांनी सोमवारी गर्जे याला जामीन मंजूर केला.

दरम्यान, गर्जे याने जामिनाची मागणी करताना त्याने डॉ. गौरी यांना आत्महत्येस प्रवृत्त केल्याचे कृत्य उघड करणारे पुरावे नसल्याचा दावा केला होता. केवळ वैवाहिक वादामुळे आणि आपल्यावर दबाव आणण्यासाठी आपल्यासह आपल्या कुटुंबातील सदस्यांना गोवण्यात आले. हा एकप्रकारे कायद्याचा गैरवापर आहे, असा दावाही गर्जे याने अर्जात केला होता. हे प्रकरण गृहितकांवर आधारित असल्याचेही त्याने अर्जात म्हटले होते.

डॉ. गौरी यांचा छळ केल्याचे कोणतेही स्वतंत्र विधान, दस्तऐवजी पुरावा किंवा इलेक्ट्रॉनिक संवाद किंवा कोणतीही विशिष्ट घटनेचा तपशील पोलिसांनी सादर केलेला नाही याचा पुनरूच्चारही गर्जे याने जामीन अर्जात केला होता. दुसरीकडे, तपासाचा हवाला देऊन पोलिसांनी गर्जे याच्या जामीन अर्जाला विरोध केला होता, तसेच, आरोपीने त्याच्या पत्नीला शारीरिक आणि मानसिक त्रास दिल्याचेही म्हटले होते.