विधानसभेतील लक्षवेधीसाठी आमदार आग्रही

आपल्या मतदार संघातील महत्वाच्या तातडीच्या घडामोडी किंवा प्रश्नांकडे सभागृहाच्या माध्यमातून सरकारचे लक्ष वेधण्यासाठी आमदारांकडून लक्षवेधीचा वापर केला जातो. विधिमंडळात सर्वसाधारणपणे तीन ते पाच लक्षवेधी दररोज कामकाजात चर्चेला घेण्याची प्रथा- परंपरा असताना अलिकडच्या काळात दररोज १० ते २५ पर्यंत लक्षवेधी कामकाज पत्रिकेवर घेतल्या जातात. अनेकवेळा अखेरच्या क्षणी लक्षवेधी सूचना येत असल्याने त्यावर विभागाकडून उत्तर घेण्यात आणि त्याची सत्य माहिती सभागृहात देण्यात मोठी कसरत करावी लागत असल्याने अनेक मंत्र्यांनी मुख्यमंत्री देवेंद्र फडणवीस तसेच विधानसभा अध्यक्ष राहूल नार्वेकर यांच्याकडे वेळोवेळी नाराजी व्यक्त केली होती. त्याची दखल घेत विधिमंडळाच्या अर्थसंकल्पीय अधिवेशनात प्रथमच लक्षवेधी सूचनांना लगाम घालण्यात आला आहे. या अधिवेशनात दररोज सुमारे पाच लक्षवेधी चर्चेला येत आहेत. मात्र लक्षवेधीवरील निर्बंधामुळे आपल्या मतदार संघातील महत्वाच्या प्रश्नांना न्याय मिळत नाही.

सभागृहात प्रश्न मांडण्याच्या आयुधांपैकी लक्षवेधी हे महत्वाचे आयुध असून सभागृहात लक्षवेधीच्या माध्यमातून मांडलेल्या प्रश्नावर मंत्री लगेच उत्तर देत असल्याने न्याय मिळतो, त्यामुळे दररोजच्या कामकाजातील लक्षवेधींची संख्य वाढवावी अशी मागणी सर्वपक्षीय आमदारांनी विधानसभा अध्यक्षांकडे केली आहे. सुमारे दीडेश आमदारांनी याबाबत सह्यांचे निवेदन अध्यक्षांना दिले असून त्यावर मुख्यमंत्री आणि अध्यक्ष कोणती भूमिका घेतात याकडे आमदारांचे लक्ष लागले आहे.