राजावाडी रुग्णालयात तीन नवजात अर्भकांचा मृत्यू

राजावाडी रुग्णालयात प्रसूतीसाठी दाखल झालेल्या तीन महिलांपैकी दोन महिलांच्या बाळाचा गर्भातच मृत्यू झाला तर एका बाळाचा जन्मानंतर दोन तासांनंतर मृत्यू झाला. रुग्णालयातील डॉक्टरांच्या हलगर्जीमुळे या बाळाच्या मृत्यू झालाचा आरोप करत मनसेने सुमारे दीड तास राजावाडी रुग्णालयाच्या अधिष्ठाता यांना घेराव घातला. मृत्यूंची चौकशी व्हावी, दोषींवर गुन्हा दाखल करण्यात यावा अशी भूमिका मनसेच्या पदाधिकाऱ्यांनी घेतली. तसेच कारवाई न झाल्यास तीव्र आंदोलनाचा इशाराही दिला.

रुग्णालय प्रशासनाने दिलेल्या माहितीनुसार, एका महिलेच्या बाळाचा गर्भातच मृत्यू झाला होता. संबंधित महिला उच्च रक्तदाब आणि मधुमेहाने त्रस्त होती. अन्य एका प्रकरणात उपचारादरम्यान काही अडचणी आल्या. तिन्ही प्रकरणांमध्ये वैद्यकीय कारणे असल्याचे रुग्णालय प्रशासनाने स्पष्ट केले. रुग्णालयातील आवश्यक सुविधा सुरू होत्या. मात्र, एकाच दिवशी तीन अर्भकांचा मृत्यू झाल्याने या प्रकरणांची चौकशी केली जाईल, असे रुग्णालय प्रशासनाने स्पष्ट केले.

उपनगरीय रुग्णालयाचे अधीक्षक डॉ. चंद्रकांत पवार आणि रुग्णालयाच्या वरिष्ठ वैद्यकीय अधिकारी डॉ. भारती राजुलवाला यांच्याकडून सर्व माहिती घेतली आहे. त्यांना या प्रकरणाची चौकशी करण्याचे आदेश देण्यात आले आहे. नेमके या नवजात शिशुच्या मृत्यूचे कारण काय? हे चौकशीतून समोर येणार असल्याचे आरोग्य समितीचे अध्यक्ष हरिष भांदिर्गे यांनी सांगितले.