‘रिपाइं’चे बंड शमले : मुख्यमंत्री फडणवीसांना भेटताच आठवले नरमले, १२ जागांवर केली तडजोड

मंत्री रामदास आठवले यांचा ‘रिपब्लिकन पार्टी ऑफ इंडिया’ महायुतीचा घटक पक्ष आहे. या पक्षाने मुंबईत १७ जागा मिळाव्यात, अशी मागणी भाजपकडे केली होती. मात्र नामांकन दाखल करण्याच्या शेवटच्या दिवसापर्यंत तोडगा निघू शकला नाही. त्यामुळे ‘रिपाइं’ कार्यर्त्यांनी ३९ मतदारसंघात उमेदवारी दाखल केली होती. महायुतीबरोबर ‘रिपाइं’ मैत्रीपूर्ण लढती करेल, असे आठवले यांनी जाहीर केले होते.

आज मुख्यमंत्री देवेंद्र फडणवीस यांची मंत्री रामदास आठवले यांनी भेट घेतली. त्यानंतर आठवले यांनी पवित्रा बदलला. १२ जागांवर आठवले यांनी तडजोड केली. त्या १२ जागासुद्धा ६ भाजपाने आणि शिंदे यांच्या शिवसेनेने ६ द्यायच्या आहेत. तसेच या जागा त्या त्या पक्षांच्या म्हणजे कमळ व धनुष्यबाण या चिन्हावर आठवले यांचे कार्यकर्ते लढतील, असे आठवले यांचे म्हणणे आहे.

या १२ जागांव्यतिरिक्त १८ जागांवर ‘रिपाइं’ मंत्रीपूर्ण लढतील करेल, असे आठवले म्हणाले आहेत. तर १९७ मतदारसंघात महायुतीला आठवले यांचा पाठिंबा असणार आहे. त्याव्यतिरिक्त आठवले यांनी मुंबई महानगरपालिकेत दोन स्वीकृत नगरसेवक, दोन विधान परिषद सदस्य आणि ६० महामंडळ सदस्यांची मागणी मुख्यमंत्री देवेंद्र फडणवीस यांच्याकडे केली आहे.

रामदास आठवले यांना २०१७ च्या महापालिका निवडणुकीत मुंबईत १७ जागा देण्यात आल्या होत्या. मात्र त्यापैकी एकही जागा ‘रिपाइं’ला जिंकता आली नव्हती. यावेळी आठवले हे १२ जागा लढणार आहेत. त्याबरोबरच आठवले यांना मुंबई महानगरपालिकेमध्ये उपमहापौर पदही हवे आहे. मुंबईत अनुसूचित जातीचे १६ लाखांपेक्षा अधिक मतदार आहेत. सर्व २२७ मतदारसंघात आपल्या मतदारांचा महायुतीला लाभ होईल, असा आठवले यांचा दावा आहे.

फुसके बंड : ॲड. प्रकाश आंबेडकर यांच्या वंचित बहुजन आघाडीने काँग्रेसकडून मुंबईत ४६ मतदारसंघ घेतले आहेत. त्यामुळे आठवले यांच्यावर त्यांच्या कार्यकर्त्यांचा अधिक जागा पदरात पाडून घेण्यासाठी दबाव आहे. त्या पार्श्वभूमीवर आठवले यांनी ३९ मतदारसंघात कार्यकर्त्यांना उमेदवारी दाखल करण्यास सांगितले होते. परंतु २४ तासात त्यांनी घुमजाव करत केवळ १२ जागांवर तडजोड केल्याने ‘रिपाइं’चे बंड फुसके निघाले आहे.