मास्टर ब्लास्टर सचिन तेंडुलकरला एअर इंडियाच्या केबिनचे कौतुक; विमानातील अनुभव ‘नवीन गाडी घेतल्यासारखा’

आजचा हवाई प्रवास हा आधुनिक जीवनातील सर्वात उल्लेखनीय पण गुंतागुंतीच्या अनुभवांपैकी एक आहे. विमान वाहतुकीचे बदलणारे स्वरूप आराम, खर्च आणि सोयीवर केंद्रित आहे. जिथे प्रवाशाच्या अनुभवातील अगदी लहान बाबींनाही खूप महत्त्व असते. त्यामुळे जेव्हा एखादा सेलिब्रिटी एखाद्या विशिष्ट एअरलाइनकडून मिळालेल्या सेवेबद्दल हलक्याफुलक्या पद्धतीने टिप्पणी करतो, तेव्हा ती गोष्ट लक्ष वेधून घेते आणि व्हायरल होते. क्रिकेटपटू सचिन तेंडुलकरने एअर इंडियाच्या एका सुधारित विमानातून प्रवास केल्यानंतर प्रशंसा केली.

एक्स (X) वर शेअर केलेल्या एका पोस्टमध्ये सचिनने लिहिले, “आज एका नूतनीकरण केलेल्या विमानात ‘नवीन गाडी घेतल्याचा’ अनुभव घेतला. हे नक्की की, मी खिडकीबाहेर पाहण्यापेक्षा केबिनमध्ये आजूबाजूलाच जास्त वेळ घालवला. या सुंदर सकाळबद्दल एअर इंडियाच्या क्रूचे आभार.” एअर इंडियानेही तेंडुलकरच्या पोस्टला क्रिकेट-थीमवर आधारित उत्तर दिले. एअरलाइनने लिहिले, ” हे नूतनीकरण अगदी अचूक ठरले आहे. मास्टर ब्लास्टर, तुम्हाला लवकरच आमच्या खेळपट्टीवर पुन्हा भेटण्यास उत्सुक आहोत.”

या संवादावर सोशल मीडियावर बऱ्याच प्रतिक्रिया उमटल्या. ज्यात वापरकर्त्यांनी सचिन तेंडुलकरच्या पोस्टचे आणि एअर इंडियाच्या मार्मिक उत्तराचे कौतुक केले. एका वापरकर्त्याने लिहिले, “जुनी ७८७ विमाने अखेर दुरुस्त होत आहेत हे पाहून आनंद झाला. जुन्या, तुटलेल्या आसनांच्या तुलनेत नवीन विमाने खूपच सुधारित आहेत.”

दुसऱ्या एका वापरकर्त्याने लिहिले, “होय, @airindia, मला तुमची नवीन सुधारित विमाने खूप आवडतात. कृपया सिंगापूर-भारत मार्गांवर तुमची नवीन मोठी विमाने वापरा. आणखी एकाने टिप्पणी केली,” कमाल कर डाला एअर इंडिया ने. सचिन भाऊ मंजूर!”

“हा एक क्लासिक मास्टर ब्लास्टर क्षण आहे, जेव्हा केबिन अपग्रेडसुद्धा प्रवासाचे मुख्य आकर्षण ठरते @airindia,” अशी एक कमेंट होती.

एअर इंडियाने आपले पहिले रेट्रोफिटेड B787-8, VT-ANT धावपट्टीवर आणले आहे. केबिनचा संपूर्ण कायापालट होणाऱ्या २६ ड्रीमलायनर्सपैकी हे पहिले विमान आहे. विमानात, दोन-श्रेणी रचनेऐवजी नवीन आसने आणि एका ताज्या इन-फ्लाइट मनोरंजन प्रणालीसह आधुनिक तीन-श्रेणी रचना आहे. विमानाला नवीन रंगही दिला आहे. जुना रंग काढून टाकण्यासाठी आणि एअरलाइनचे नवीन रूप सादर करण्यासाठी तज्ज्ञांनी १८ दिवसांत ५,७०० तासांहून अधिक वेळ काम केले.