सैफ अली खानवरील हल्ल्यातील आरोपीविरोधात खटला सुरूच राहणार; गुन्हा कबूल करण्यास तयार असल्याचा अर्ज न्यायालयाने फेटाळला

या घटनेनंतर दोन दिवसांनी अटक करण्यात आलेला मोहम्मद शरीफुल इस्लाम सध्या न्यायालयीन कोठडीत आहे. शरीफुल याने गुन्हा कबूल करण्याची तयारी दर्शवणारा अर्ज न्यायालयात दाखल केला होता आणि न्यायालयाकडे दयेची विनंती केली होती. अतिरिक्त सत्र न्यायाधीश जी. पी. देशमुख यांनी शुक्रवारी त्याच्या अर्जावर निर्णय देताना तो फेटाळला.

या महिन्याच्या सुरुवातीला, अतिरिक्त सत्र न्यायाधीश जी. पी. देशमुख यांनी शरीफुल याच्यावर आरोप निश्चित केले होते, त्यामुळे, त्याच्यावरील खटला चालवण्याचा मार्ग मोकळा झाला होता. शरीफुल याच्यावर दरोडा घालण्याच्या उद्देशाने घातक शस्त्राचा वापर करणे, गंभीर दुखापत करणे आणि घरात अनधिकृत प्रवेश करणे यासारख्या भारतीय न्याय संहितेतील संबंधित कलमांतर्गत, तसेच परदेशी नागरिक कायदा आणि पारपत्र (भारतात प्रवेश करणे) अधिनियमांतील संबंधित कलमांतर्गत आरोप ठेवण्यात आले आहेत.