मुंबई पोलिसांकडून ड्रग्ज सप्लायर्सच्या विरोधात एक विशेष मोहिम चालवली जात आहे. शहरात वेगवेगळ्या प्रकारचे ड्रग्ज पुरवणाऱ्या लोकांवर नजर ठेवली जात आहे. नुकतंच एका महिलेकडून सात किलो हेरॅाईन जप्त केलं गेलं असून संबंधित महिला ही मुंबईतील टॅाप ड्रग्ज पेडलर्सपैकी एक असल्याची माहिती पोलीस उपायुक्त दत्ता नलावडे यांनी दिली. मुंबई शहरात ड्रग्ज पुरवणाऱ्या लोकांचं मोठ रॅकेट समोर आलं आहे. अटक करण्यात आलेली महिला ही गेल्या १० वर्षांपासून या धंद्यात आहे, असेही दत्ता नलावडे यांनी सांगितले. आत्तापर्यंत ड्रग्जची ८ नविन प्रकरणे समोर आली आहेत. त्यामध्ये एकूण १६ किलो हेरॅाईन जप्त केले गेले आहेत. त्यापैकी तीन जणांना राजस्थानमधून अटक करण्यात आली आहे. जप्त करण्यात आलेल्या ड्रग्जची किंमत २१ कोटी रूपये आहे, असंही नलावडे म्हणाले. राजस्थान ते मुंबई अशी एक सप्लाय चेन.. "ह्युमन कुरिअर्सचा वापर करत मुंबईत ड्रग्जचा प्रवास होत आहे. राजस्थान ते मुंबई अशी एक ड्रग्ज सप्लाय करणाऱ्यांची साखळी असून या तपासात आम्हाला यातील काही जणांची नावे कळाली आहेत. ज्यांची नाव आम्ही लवकरच उघड करू. क्राईम ब्रांचच्या युनिट ७ ने सेक्स टुरिझमचा भंडाफोड केला असुन दोन व्यक्तींना अटक करण्यात आली आहे. याप्रकरणाचा तपास सुरू आहे," असंही दत्ता नलावडे यांनी सांगितलं.