टॅटूची शाई, अगरबत्तीतील रसायनांवर एफडीएचे नियंत्रण हवे, माजी महापौर शुभा राऊळ यांची तुकाराम मुंढे यांच्याकडे मागणी

टॅटूसाठी वापरण्यात येणाऱ्या शाईच्या गुणवत्तेवर आणि त्यातील घटकांवर सध्या पुरेसे नियंत्रण नसल्याचा मुद्दा शुभा राऊळ यांनी उपस्थित केला. टॅटूच्या शाईमुळे काही व्यक्तींना त्वचेची अॅलर्जी, सूज यांसारख्या समस्या निर्माण होऊ शकतात. काही शाईमध्ये आर्सेनिक, क्रोमियम यांसारख्या विषारी धातूंसह अन्य घातक धातू आढळतात. त्यामुळे गंभीर आरोग्यविषयक समस्या उद्भवण्याची शक्यता असल्याने टॅटूच्या शाईची गुणवत्ता, त्यातील रसायने आणि त्याच्या वापरावर नियंत्रण एफडीएचे नियंत्रण आवश्यक असल्याचे मत राऊळ यांनी व्यक्त केले. तसेच विविध पर्यटनस्थळे, हिल स्टेशन आणि जत्रांमध्ये टॅटू काढणारे पथाऱ्या पसरून बसतात. त्यामुळे शाईतील घटक, त्याचे संभाव्य दुष्परिणाम आणि सुरक्षिततेबाबत स्पष्ट नियम असणे आवश्यक असल्याचेही त्या म्हणाल्या. अगरबत्तीचा धूर देखील आरोग्याला हानीकारक असून त्यामुळे डोकेदुखी, डोळ्यांची जळजळ, घसा दुखणे व अस्थमासारखे रोग बळवतात. त्यामुळे अगरबत्ती हा विषय देखील एफडीएच्या नियंत्रणाखाली यावा. तसेच अगरबत्तीचा पाकिटवर उत्पादनातील रसायनाची माहिती नमूद असावी, असे मत राऊळ यांनी व्यक्त केले.

अधिकृत खाद्यपदार्थ विक्रेत्यांना एफडीएचे एफएसएसएआई आणि महानगरपालिकेचे परवाने घ्यावे लागतात. हे दोन्ही परवाने वेगवेगळ्या प्राधिकरणाकडून घेण्यापेक्षा एक छत्री कार्यक्रम राबवावा. तसेच महापालिका किंवा एफडीए यापैकी एकच परवाना पुरेसा असल्यास विक्रेत्यांना नूतनीकरणाचा त्रास होणार नाही, असेही त्या म्हणाल्या. या सर्व बाबींवर चर्चा झाल्यानंतर आयुक्त तुकाराम मुंढे यांनी देखील सकारात्मक प्रतिसाद दिल्याचे राऊळ यांनी सांगितले.