परिवर्तनाची सुरुवात महाराष्ट्रातून होईल, काँग्रेसचे नवनियुक्त प्रभारी डॉ. सिरिवेल्ला प्रसाद यांचा विश्वास

डॉ. सिरिवेल्ला प्रसाद यांनी आज काँग्रेसचे प्रदेश मुख्यालय असलेल्या टिळक भवन येथे प्रभारी पदाचा कार्यभार स्वीकारला. त्यावेळी आयोजित कार्यक्रमात बोलताना त्यांनी भाजपवर हल्ला चढवला. यावेळी प्रदेशाध्यक्ष हर्षवर्धन सपकाळ, विधीमंडळ पक्ष नेते विजय वडेट्टीवार, विधान परिषदेतील गट नेते सतेज पाटील, पक्षाचे सरचिटणीस मुकुल वासनिक आदी उपस्थित होते. देशात कोणतीही घटना घडली तरी पंतप्रधान मोदी त्यावर काहीच बोलत नाहीत. शेतकऱ्यांच्या आत्महत्या होत आहेत. दलित, अल्पसंख्याक, महिला यांच्यावर अत्याचार वाढले आहेत. महाराष्ट्रातही वेगळी परिस्थिती नाही. महाराष्ट्रातून उद्योग बाहेरच्या राज्यात जात आहेत. त्यामुळे नोकऱ्या संपत चालल्या असून बेरोजगारी प्रचंड वाढली आहे. महाराष्ट्रात ६५ टक्के लोक भाजप-आरएसएस विरोधी विचाराचे असल्याचे डॉ. प्रसाद यांनी सांगितले. काँग्रेस कार्यकर्त्यांनी शेतकरी, कष्टकरी, दलित, अल्पसंख्याक, तरुणवर्गासाठी काम करावे, असे आवाहनही त्यांनी केले.

हर्षवर्धन सपकाळ यांनी यावेळी संघटन मजबुतीवर भर दिला. यावर्षी संघटना विस्तारावर काम करायचे असून बुथस्तरावर, ग्राम पातळीवर, मंडळ स्तरावर काँग्रेसचा विस्तार झाला पाहिजे. हे संघटना विस्ताराचे काम ३१ डिसेंबरपर्यंत पूर्ण केले जाईल. आपल्याला भाजप आणि मित्रपक्षांना हरवायचे आहे. सध्या राज्यात भाजप सरकारविरोधी वातावरण असल्याने भाजप पराभवाचे लक्ष्य ठेवून काम करा, असे सपकाळ म्हणाले.

खासदारांबरोबरील मतभेद मिटले – वडेट्टीवार

चंद्रपूरमध्ये महापालिका निवडणूक काळात काँग्रेस नेते विजय वडेट्टीवार आणि खासदार प्रतिभा धानोरकर यांच्यातील वाद उफाळून आलाहोता.. या वादाचा फटका पक्षाला बसल्यानंतरही यांच्यातील वाद निवळला नव्हता. अखेर नवनियुक्त प्रभारी डॉ. सिरिवेल्ला प्रसाद यांच्या उपस्थितीत वडेट्टीवार यांनी नाव घेऊन धानोरकर आणि अपाल्यातील मतभेद संपल्याचे जाहीर केले. काँग्रेस पक्षात मतभेद आणि भांडणे संपवून काम केले पाहिजे. वाद मिटवण्याची सुरुवात चंद्रपूरपासून करूयात असे म्हणताना सरकार बदलण्यासठी आपल्यातील मतभेद संपवून पुढे जावे लागे. तरच आपण सत्तेत येऊ. त्याची सुरुवात चंद्रपूरपासून करत असल्याचे ते म्हणाले.