मुंबई : नागरिकांना दिल्या जाणाऱ्या डिजिटल सेवा अधिक सुलभ, पारदर्शक आणि लोकाभिमुख करण्याच्या दिशेने झोपडपट्टी पुनर्वसन प्राधिकरणाने केंद्र सरकारच्या यूएक्सफोरजी ( युझर एक्स्परिअन्स फॅार गव्हर्नमेंट) या विशेष प्रणालीची आपल्या अधिकृत संकेतस्थळावर यशस्वी अंमलबजावणी करणारे झोपडपट्टी पुनर्वसन प्राधिकरण राज्यातील पहिले शासकीय प्राधिकरण ठरले आहे. या उपक्रमांतर्गत प्राधिकरणाच्या संकेतस्थळाचा संपूर्ण कायापालट करण्यात आला असून, आता नागरिकांना प्राधिकरणाशी संबंधित सर्व माहिती व सेवा घरबसल्या अधिक सुलभतेने आणि कमी वेळेत उपलब्ध होणार आहेत.
सरकारी संकेतस्थळांचा वापर करताना नागरिकांना भेडसावणाऱ्या तांत्रिक अडचणी दूर करून त्यांना सोपे, स्पष्ट आणि सकारात्मक डिजिटल अनुभव देणे हा केंद्र सरकारच्या प्रणालीचा मुख्य उद्देश आहे. या प्रणालीच्या अंमलबजावणीमुळे प्राधिकरणाच्या संकेतस्थळाची रचना आता अधिक सुटसुटीत, स्पष्ट आणि वापरकर्ता-केंद्रित करण्यात आली आहे. सर्वसामान्य नागरिकांना प्राधिकरणाशी संबंधित आवश्यक माहिती सहज शोधता येईल, अशा पद्धतीने संकेतस्थळाची रचना करण्यात आली आहे. विविध सेवा, अर्ज आणि त्यांच्या स्थितीची माहिती आता कमीत कमी क्लिकमध्ये उपलब्ध होणार असून, नागरिकांचा वेळ व श्रम दोन्ही वाचणार आहेत.
हे संकेतस्थळ आता संगणकासोबतच मोबाईल आणि टॅब्लेटवरही तितक्याच प्रभावीपणे वापरता येणार आहे. अधिक चांगली वाचनीयता, सुलभ मांडणी आणि आधुनिक रचनेमुळे हे संकेतस्थळ सर्व स्तरांतील नागरिकांसाठी वापरण्यास सोपे झाले आहे, प्राधिकरणाने स्पष्ट केले आहे.
या प्रणालीच्या माध्यमातून प्राधिकरणाच्या सेवा थेट सर्वसामान्यांच्या मोबाईलपर्यंत अधिक सुलभतेने पोहोचवण्याचा प्रयत्न करण्यात आला आहे. नागरिकांनी या अद्ययावत संकेतस्थळाचा लाभ घ्यावा, असे आवाहन झोपडपट्टी पुनर्वसन प्राधिकरणाचे मुख्य कार्यकारी अधिकारी डॉ. महेंद्र कल्याणकर यांनी केले आहे.
पुढील सेवा सहज उपलब्ध :
⁃ झोपडीधारकांच्या बँक खात्यावर भाडे प्रदान तपशीलाची प्रमाणित प्रत
⁃ प्रस्तावाच्या अनुषंगाने निर्गमित केलेल्या ना हरकत प्रमाणपत्राच्या प्रमाणित प्रती
⁃ प्राप्त प्रस्तावांच्या अनुषंगाने निर्गमित परिशिष्ट -VI च्या प्रमाणित प्रती
⁃ भूसंपादनाच्या प्रस्तावांच्या अनुषंगाने निर्गमित केलेल्या अभिप्रायांच्या प्रमाणित प्रती
⁃ पीएपी सदनिका वितरण प्रमाणित प्रत
⁃ ओळखपत्र सर्वेक्षण २००० ची गणना पावती पडताळणी
⁃ घोषित झोपडपट्टी ३-सी प्रस्तावाबाबत प्रमाणित प्रत
⁃ सुविधा, बालवाडी, सोसायटी कार्यालय यांचा ताबा
⁃ वापरातील बदल
⁃ भोगवटा दाखला, मंजूर नकाशांच्या प्रमाणित प्रती
⁃ सहकारी गृहनिर्माण संस्थांची नोंदणी
⁃ भोगवटा प्रमाणपत्र प्राप्त झाल्यानंतर पाच वर्षानंतर सदनिका हस्तांतरण
⁃ घरभाडेबाबत तक्रारी
⁃ झोपडीधारकांना सदनिका वाटप सोडत
⁃ जीआयएस सीडीची प्रत
⁃ परिपत्रक क्रमांक १४४ अन्वये ना हरकत प्रमाणपत्राची प्रमाणित प्रत
⁃ वारसा हस्तांतरण विषयक सेवा
⁃ पात्र वा अपात्र झोपडीधारकांनी सादर केलेल्या परिशिष्ट ३ आणि परिशिष्ट ४ वर निर्णय
⁃ परिशिष्ट-२ ची अर्जदारापुरती प्रमाणित प्रत
