अहिल्याबाईंच्या जन्मगावी आज राज्याचे मंत्रिमंडळ, चौंडीमधील बैठकीत धनगर समाजासाठी महत्त्वाच्या घोषणा?

विधान परिषदेचे सभापती राम शिंदे यांच्या आग्रहावरून अहिल्यानगर जिल्ह्यातील चौंडीमध्ये मंत्रिमंडळाची बैठक आयोजित करण्यात आली आहे. या गावात विशेष सुविधा उपलब्ध नसल्या तरी स्थानिक प्रशासनाने बैठकीसाठी सारी तयारी केली आहे. विधानसभा निवडणुकीत महायुतीला मोठ्या प्रमाणावर पाठिंबा देणाऱ्या धनगर समाजाला खुश करण्याचा फडणवीस सरकारचा प्रयत्न आहे. बैठकीत नाशिक कुंभमेळा प्राधिकरण, अहिल्याबाई यांच्यावर सर्व भाषांत चित्रपट, जिल्ह्यात वैद्याकीय महाविद्यालय असे काही निर्णय होण्याची शक्यता आहे.

चौंडीमधील मंत्रिमंडळ बैठकीत धनगर समाजाचा अनुसूचित जमातीत समावेश करण्याचा ठराव मंजूर करावा व केंद्र सरकारला पाठवावा. फडणवीस यांनी धनगर आरक्षणाबाबत बारामतीपासून नागपूरपर्यंत दिलेली आश्वासने समाज विसरलेला नाही. याविषयीचा अभ्यास यापूर्वीच झाला असून केवळ निर्णय व्हायचा आहे. – विक्रम ढोणे, धनगर समाजाचे नेते