मुंबई: राज्याच्या आरोग्य विभागाने मात्र मोलनुपिराविर या करोना विषाणूवरील औषधांचा वापर करण्यास मान्यता दर्शविली असून त्याचा वापर सर्तकतेने करण्याच्या सूचना जिल्ह्यांना सोमवारी दिल्या आहेत. केंद्रीय आरोग्य विभागासह भारतीय वैदयकीय संशोधन परिषदेने (आयसीएमआर) मात्र या औषधाच्या वापराला विरोध दर्शविला आहे. विषाणूचा एकदा शरीरात प्रवेश झाल्यानंतर वेगाने त्याची प्रतिरूपे तयार होतात. मोलनुपिराविर या विषाणूरोधक अन्टीव्हायरल गोळ्या असून हे विषाणूची प्रतिरुपे तयार होऊ न देण्याचे काम करत असून विषाणूला क्षीण करते. केंद्रीय आरोग्य विभागाने १७ जानेवारीला जाहीर केलेल्या मार्गदर्शक तत्त्वांमध्ये या औषधाचा समावेश केलेला नाही. तसेच आयसीएमआरनेही करोना उपचारांमध्ये त्याचा वापर न करण्याची शिफारस केली आहे. ओडिशासारख्या राज्यांनी बाजारात या औषधावर बंदी घातली आहे. या औषधाला अन्न व औषध प्रशासनाची परवानगी मिळालेली नाही. परंतु वैद्यकीय चाचण्यांमध्ये या औषधामुळे रुग्णालयातील कालावधी कमी होत असल्याचे आढळल्याने आपत्कालीन वापरास देण्यात आली आहे. तज्ज्ञांच्या मतानुसार त्याचा राज्याच्या करोना उपचारविषयक मार्गदर्शक तत्त्वांमध्येही ६ जानेवारीला समावेश केला आहे. केंद्राने विरोध केल्यानंतरही राज्याच्या आरोग्य विभागाने याच्या वापराला संमती दर्शविली आहे. मोलनुपिराविर या औषधाचा वापर अधिक सतर्कतेने, आवश्यकता असल्यास करावा आणि पूर्ण मात्रा वापरावी असे आरोग्य विभागाचे अपर सचिव डॉ. प्रदीप व्यास यांनी जिल्ह्यांना सोमवारी दिलेल्या पत्रामध्ये नमूद केले आहे. सौम्य लक्षणे असून प्राणवायूची आवश्यकता भासलेली नाही, दीर्घकालीन आजार असून रुग्णालयात दाखल करण्याची गरज भासू शकते किंवा आजाराची तीव्रता वाढण्याचा संभव आहे, आधीच्या कोणत्याही उपचारांनी रुग्ण बरा न झाल्यास, दुसरा कोणताही पर्याय उरलेला नाही, अशा वेळीच या औषधाचा वापर करावा. तसेच या औषधाचा वापर लक्षणे दिसल्यापासून पाच दिवसांच्या आत करावा आणि औषधाचा वापर करण्यास दुष्परिणाम होण्यासारख्या अन्य काही बाबी नसाव्यात, असे या पत्रात स्पष्ट केले आहे. यांना हे औषध देऊ नये १८ वर्षांखालील बालके, गर्भवती महिला यांना हे औषध देऊ नये. तसेच या औषधामुळे जन्माला येणाऱ्या बाळामध्ये व्यंग निर्माण होण्याची शक्यता असल्यामुळे महिलेला हे औषध दिल्यास औषध घेण्याच्या काळात आणि शेवटची मात्रा घेतल्यानंतर किमान तीन महिने महिला गर्भवती राहणार नाही यासाठी योग्य गर्भनिरोधक साधनांचा वापर करणे गरजेचे आहे. मोलनुपिराविर हे औषध पुरुषांमधील शुक्राणूंवरही दुष्परिणाम करण्याची शक्यता असल्याचे या पत्रात नमूद करण्यात आले आहे. पूर्ण मात्रा घेणे आवश्यक या औषधाच्या काही मात्रा घेतल्यास विषाणूचे उत्परिवर्तन होण्याचा धोका अधिक आहे. त्यामुळे या औषधाच्या सर्व मात्रा पूर्ण करणे आवश्यक आहे, असेही यात स्पष्ट केले आहे. आयसीएमआरचा विरोध करोनाविषयक राष्ट्रीय कृती दलाने मोलनुपिराविर या करोना विषाणूमारक औषधांचा समावेश करोनाविषयक औषधांच्या यादीत करण्यास विरोध केला आहे. जागतिक आरोग्य संघटना आणि ब्रिटननेही या औषधाच्या उपचारास मान्यता दिलेली नाही. या औषधाचे काही दुष्परिणाम आहेत. हे औषध घेतल्याने विकसित होत असलेल्या गर्भाला बाधा पोहोचते, तसेच स्नायूंवरही दुष्परिणाम होत असल्याचे आढळले असल्याने त्याला विरोध केल्याचे ‘आयसीएमआर’चे प्रमुख डॉ. बलराम भार्गव यांनी गेल्या आठवड्यात सांगितले होते.