मुंबई : राज्यात डिसेंबरच्या पहिल्या आठवड्यापर्यंत ७३ सहकारी आणि ७० खासगी, अशा जेमतेम १४३ कारखान्यांनी गाळप हंगाम सुरू केला आहे. गतवर्षी एकूण २०७ कारखान्यांनी गाळप केले होते. गतवर्षीच्या तुलनेत यंदा कमी कारखाने सुरू झाले आहेत.
साखर आयुक्तालयातून देण्यात आलेल्या माहितीनुसार, यंदा राज्यातील २०७ कारखान्यांनी गाळप परवान्यांसाठी अर्ज केले होते. पहिल्या टप्प्यात १७९ कारखान्यांना गाळप परवाने देण्यात आले होते. त्यानंतर आणखी सात, अशा १८६ कारखान्यांना परवाने दिले आहेत. पाच कारखान्यांचे प्रस्ताव प्रादेशिक स्तरावर अडकले आहेत. त्यामुळे साखर आयुक्तालयाकडून एकूण १८६ कारखान्यांना गाळपासाठी परवाने दिले असले तरीही पाच डिसेंबरअखेर १४३ कारखान्यांची गाळप सुरू केले आहे. मागील वर्षी १०३ सहकारी, १०४ खासगी, अशा २०७ कारखान्यांनी गाळप सुरू केले होते. साखर आयुक्तालयाने परवाने देऊन गाळप करणाऱ्या कारखान्यांची संख्या वाढलेली दिसत नाही.
विदर्भात धुराडी बंदच
राज्यातील १४३ कारखान्यांनी पाच डिसेंबरअखेर १०५.४७ लाख टन उसाचे गाळप करून सरासरी ७.६४ टक्के साखर उताऱ्याने साडेआठ लाख टन साखर उत्पादन घेतले आहे. कोल्हापूर साखर विभागातील साखर उतारा सर्वांधिक असून, नऊ टक्क्यांवर गेला आहे. नागपूर साखर विभागात अद्याप धुराडे पटले नाही. गत हंगामात चार खासगी कारखाने सुरू होते. यंदा एकही कारखाना सुरू झालेला नाही. अमरावती विभागातही गतवर्षी चार कारखाने सुरू होते, यंदा यवतमाळमधील डेक्कन शुगर प्रा. लि. मंगळूर हा एकच खासगी कारखाना सुरू झाला आहे. हा अपवाद वगळता विदर्भातील सर्व कारखान्यांची धुराडी बंद आहेत.
हेही वाचा – दुसर्या टप्प्यात पाॅड टॅक्सीची शीव रेल्वे स्थानकापर्यंत धाव, १६ स्थानकांचा समावेश
गाळप क्षमता वाढली
गाळप परवानगीसाठी साखर आयुक्तलयाकडे अर्ज केलेल्या बहुतेक कारखान्यांना परवाने दिले आहेत. ज्या कारखान्यांच्या अर्जात त्रुटी आहेत, त्या पूर्ण करून कारखान्यांना परवाने दिले जात आहेत. मागील वर्षाच्या तुलनेत यंदा कारखान्यांच्या गाळप क्षमतेत वाढ झाली आहे, अशी माहिती साखर सहसंचालक महेश झेंडे यांनी दिली.
