मुंबई : संघटित गुन्हेगारी टोळय़ांचे कंबरडे मोडण्यासाठी त्यांच्या हस्तकांना तडीपार करण्यात येत होते. आता मुंबई पोलिसांनी अमली पदार्थाची तस्करी करण्यात सक्रिय असलेल्या दोन महिला तस्करांवर तडीपारीची कारवाई केली आहे. दोघींविरोधात अनेक गुन्हे दाखल असून त्या अमली पदार्थाच्या तस्करीसाठी सक्रिय टोळी चालवत असल्यामुळे त्यांच्याविरोधात ही कारवाई करण्यात आली आहे. हसीन बानो अली शेख (३३) आणि फिरदोस रशीद शेख ऊर्फ लछो (३०) या दोघीही ट्रॉम्बे येथील चित्ता कॅम्प येथील रहिवासी आहेत. तहसीनची अमली पदार्थ तस्करीची साखळी आहे आणि फिरदोस ही तिच्या टोळीचा प्रमुख सदस्य आहे. दोघीही पूर्व मुंबई भागात प्रामुख्याने ट्रॉम्बे परिसरात अमली पदार्थाच्या विक्रीत सक्रिय आहेत, असे पोलिसांनी सांगितले. दोघींचे पतीही सराईत गुन्हेगार आहेत. त्यांच्यावर आधीच मोक्का आणि अमली पदार्थ प्रतिबंधक कायद्यांतर्गत गंभीर गुन्हे दाखल आहेत. त्यामुळे ते सध्या तरुंगात आहेत. त्यांच्या अनुपस्थितीत तहसीन आणि फिरदोस या परिसरात अमली पदार्थाचा व्यवसाय करीत होत्या. त्यांची टोळी अमली पदार्थ, विशेषत: गांजा विकत होत्या, असे अधिकाऱ्याने सांगितले. या परिसरात त्यांची वाढती दहशत पाहून ट्रॉम्बे पोलीस ठाण्याच्या वरिष्ठ निरीक्षक रेहाना शेख यांनी दोघींवर कारवाई करण्याचा निर्णय घेतला.
