राज्यामध्ये सुरु असणाऱ्या अभुतपूर्व सत्तासंघर्षाच्या पार्श्वभूमीवर शिवसेनेत उभी फूट पडली आहे. शिवसेनेचे बंडखोर नेते एकनाथ शिंदे विरुद्ध शिवसेना असा संघर्ष मागील काही दिवसांपासून दिसून येत असतानाच शिवसेनेची बाजू पक्षाचे प्रवक्ते संजय राऊत प्रसारमाध्यमांसमोर मांडताना दिसत आहेत. बुधवारी राज्याचे मुख्यमंत्री आणि शिवसेना पक्षप्रमुख उद्धव ठाकरेंनी मुख्यमंत्रीपदाबरोबरच पक्षप्रमुखपदही सोडण्याची ऑफर बंडखोर आमदारांना दिली. राज्यातील या सत्तासंघर्षामध्ये शिंदे गट आणि शिवसेनेकडून एकमेकांवर आरोप प्रत्यारोप केले जात आहेत. त्यातच आता बंडखोर नेत्यांना थेट आव्हान देणारी बॅनर्स मुंबईत झळकल्याची चित्र दिसत आहेत. विशेष म्हणजे शिवसेनेच्या नगरसेविकेने लावलेल्या या बॅनर्सवर शिवसेनेचे प्रवक्ते आणि खासदार संजय राऊत यांचा फोटो झळकत आहे. शिवसेनेच्या नगरसेविका दिपमाला बढे यांनी शिवसेनेचे खासदार संजय राऊत यांच्या निवासस्थानाबाहेर नावासहीत हा बॅनर झळकावला आहे. या बॅनरवर, "तेरा घमंड तो चार दिन का है पगले, हमारी बादशाही तो खांदानी है" अशा ओळी लिहिण्यात आल्या असून संजय राऊतांचा आक्रमक फोटो दिसत आहे. सध्या हे फोटो सोशल मीडियावर चर्चेचा विषय ठरत आहेत.
