अंधेरी पश्चिम येथील चारबंगला परिसरातून दोन संशयीत आरोपींना पिस्तुलासह अटक करण्यात पोलिसांना यश आले आहे. आरोपींकडून दोन गावठी पिस्तुले व सहा जिवंत काडतुसे जप्त करण्यात आली आहेत. वर्सोवा पोलिसांनी याप्रकरणी दोन आरोपींविरोधात भारतीय हत्यार बंदी कायद्यांतर्गत गुन्हा दाखल केला आहे. अंधेरी चारबंगला परिसरात एक संशयीत पिस्तुलांची विक्री करण्यासाठी येणार असल्याची माहिती सहाय्यक पोलीस निरीक्षक जावेद शेख यांना मिळाली होती. पोलिसांनी सापळा रचून दोघांना अटक केली. हेही वाचा >>> VIDEO: “…तर त्यांचा कोथळा बाहेर काढल्याशिवाय राहायचं नाही”, ठाकरेंच्या दसरा मेळाव्याचा दुसरा टीझर लाँच शनिसिंह मुकेशकुमार ठाकूर (२१) व अब्दुल करीम रेहमान अन्वर कुरेशी (४९) अशी अटक करण्यात आलेल्या आरोपींची नावे आहेत. यातील ठाकूर हा मूळचा उत्तर प्रदेशातील रहिवासी असून तेथे पिस्तुलाची विक्री करण्यासाठी आला होता. कुरेशी याने आरोपीकडून एक पिस्तुल खरेदी केली. ठाकूरकडून एक पिस्तुल व चार काडतुसे तसेच कुरेशीकडून एक पिस्तुल व दोन काडतुसे जप्त करण्यात आल्या आहेत. आरोपींना न्यायालयाने ६ ऑक्टोबरपर्यंत पोलीस कोठडी सुनावली आहे.
