संघ मुख्यालयावर मोर्चा: वंचित, काँग्रेसचा निर्णय, २३ मार्च रोजी ठरला दिवस, मोदींच्या कारभाराच्या निषेधार्थ आंदोलन

काँग्रेस आणि वंचित बहुजन आघाडी हे नागपूर येथील राष्ट्रीय स्वयंसेवक संघ (आरएसएस) मुख्यालयासमोर २३ मार्च रोजी धरणे आंदोलन करणार आहेत.

काँग्रेस प्रदेशाध्यक्ष हर्षवर्धन सपकाळ (लोकसत्ता टिम)

मुंबई : काँग्रेस आणि वंचित बहुजन आघाडी हे नागपूर येथील राष्ट्रीय स्वयंसेवक संघ (आरएसएस) मुख्यालयासमोर २३ मार्च रोजी धरणे आंदोलन करणार आहेत. वंचितच्या प्रदेश कार्यालयामध्ये अॅड. प्रकाश आंबेडकर, काँग्रेस प्रदेशाध्यक्ष हर्षवर्धन सपकाळ, आम आदमी पार्टीचे सुदेश पटेल, भाकपचे आमिर अब्दुल काझी यांच्या उपस्थित मंगळवारी बैठक झाली. त्यामध्ये आंदोलनाचा निर्णय घेण्यात आला.

पंतप्रधान नरेंद्र मोदी यांनी देशाचे सार्वभौमत्व अमेरिकेकडे गहाण ठेवले आहे. अमेरिकेतील बाललैंगीक गुन्ह्याशी संबंधीत एपस्टीन फाईलमध्ये नरेंद्र मोदी यांचे नाव आलेले आहे. एपस्टीन फाईल संबंधित अनेक नेत्यांना त्या त्या देशांनी पदावरून पायउतार केले आहे. मात्र नरेंद्र मोदी यांच्यावर कोणतीच कारवाई झाली नाही. तसेच मोदी यांनी याप्रकरणी खुलासा केलेला नाही. अशा व्यक्तीला देशाच्या पंतप्रधानपदी कसे काय ठेवू शकता, याच जाब आम्हाला राष्ट्रीय स्वयंसेवक संघाला विचारायचा आहे, असे आंबेडकर म्हणाले.

मध्यमवर्गीय नागरिकांनी या आंदोलनात सहभागी व्हावे. मोदी यांनी घेतलेल्या आर्थिक निर्णयांमुळे सामान्य जनतेवर गंभीर परिणाम होत आहेत. बँकिंग क्षेत्रासह अनेक क्षेत्रांमध्ये अडचणी निर्माण होण्याची शक्यता आहे, असा दावा ॲड. आंबेडकर यांनी केला.

हेही वाचा

Sunetra Pawar: महिलांच्या प्रसूती रजेबाबत उपमुख्यमंत्री सुनेत्रा पवार यांची मोठी घोषणा

ॲड. आंबेडकर यांनी मांडलेली भूमिका काळाची गरज आहे. ॲड. आंबेडकर यांच्या नेतृत्वात २३ मार्च रोजी आयोजित करण्यात आलेल्या रा. स्वं. संघ मुख्यालयावर आंदोलनाला काँग्रेसचा पूर्ण पाठिंबा राहील. या आंदोलनामध्ये काँग्रेस कार्यकर्ते सक्रियपणे सहभागी होतील, असे काँग्रेसचे प्रदेशाध्यक्ष हर्षवर्धन सपकाळ यांनी सांगितले.

२ मार्च रोजी मुंबईत या मुद्यावर वंचित बहुजन आघाडीने सीएसएमटी समोर जोरदार आंदोलन केले होते. या आंदोलनामध्ये विविध सामाजिक संघटना आणि त्यांचे कार्यकर्ते मोठ्या संख्येने सहभागी झाले होत. वंचित बहुजन आघाडीचे युवा नेते सुजात आंबेडकर यांच्या नेतृत्वाखाली छत्रपती संभाजी नगर येथील संघाच्या कार्यालयावर काही दिवसापूर्वी मोर्चा नेण्यात आला होता. संघ मुख्यालयावर आंदोलन करण्यासाठी प्रकाश आंबेडकर यांनी विरोधी पक्षांची बैठक बोलावली होती. विरोधी गटातील सर्वच पक्षांना निमंत्रणे दिली होती. मात्र काँग्रेस, आप आणि भाकप हे तीनच पक्ष आजच्या बैठकीला हजर होते. आंबेडकर यांनी राहुल गांधींना पत्र लिहू काँग्रेसने एपस्टीन फाईल प्रकरणी मोदी यांच्या विरोधातील आंदोलनात सहभागी होण्याची विनंती केली होती.