मुंब्रा येथील बाह्य़वळण मार्गावरील गीता कंपाऊंड परिसरात सोमवारी एका प्लॅस्टिकच्या गोणीत महिलेचा मृतदेह सापडला. या महिलेच्या मृतदेहाचे तीन तुकडे करण्यात आले होते. मृत महिला ३० ते ३५ वयोगटातील असून तिची तीक्ष्ण हत्याराने हत्या करण्यात आली आहे, असे पोलिसांनी सांगितले. गळा आणि कंबरेपासूनचा खालचा भाग तीक्ष्ण हत्याराने कापण्यात आला आहे. या महिलेची अद्याप ओळख पटू शकलेली नसून त्याचा पोलीस शोध घेत आहेत, तसेच तिच्या हत्येमागचे नेमके कारण शोधण्यासाठी पोलिसांनी तपास सुरू केला आहे. या प्रकरणी मुंब्रा पोलीस ठाण्यात हत्येचा गुन्हा दाखल करण्यात आला आहे.
