बाळापूर- खामगावदरम्यान दुर्घटना, चिमुकलीचा अंत टॅँकर व कारमध्ये धडक होऊन झालेल्या भीषण अपघातात ६ वर्षीय चिमुकलीसह ५ जण ठार झाले. राष्ट्रीय महामार्ग क्रमांक ६ वरील बाळापूर- खामगावदरम्यान तिरोडा फाटय़ाजवळ रविवारी दुपारी २ वाजताच्या सुमारास हा अपघात झाला. चतुर्भुज मुरलीधर कारंजावाला (४५), संगीता चतुर्भुज कारंजावाला (४०), यश चतुर्भुज कारंजावाला (सर्व रा. वापी, गुजरात), रंजना मुन्नाभाई नागर (३५, रा. बऱ्हाणपूर) व आयना मुन्नाभाई नागर (६) यांचा अपघातात घटनास्थळीच मृत्यू झाला. महामार्गावरील तिरोडा फाटय़ाजवळ टँकर व मारुती सुझुकी कारमध्ये जबरदस्त धडक झाली. या भीषण अपघातात कार पूर्णपणे चक्काचूर झाली व कारमधील पाचही जण जागीच ठार झाले. अपघातानंतर टँकरचालक घटनास्थळावरून फरार झाला. या घटनेची माहिती मिळताच बाळापूर पोलीस व महामार्ग वाहतूक पोलीस तत्काळ पोहोचले. अपघातामुळे महामार्गाच्या दोन्ही बाजूला वाहनांच्या लांबच लांब रांगा लागल्याने वाहतूक विस्कळीत झाली होती. पोलिसांनी अपघातग्रस्त वाहने रस्त्याच्या बाजूला करून वाहतूक सुरळीत केली. संगीता कारंजावाला व रंजना नागर या दोघी बहिणी मुलांसह बाळापूरला भावाकडे येत होत्या. या मार्गातच हा अपघात झाल्याने पती, पत्नी मुलासह मायलेकींचा करुण अंत झाला. मृतदेह उत्तरीय तपासणीसाठी रुग्णालयात पाठवण्यात आले.
