गडचिरोली जिल्ह्य़ातील दुर्गम नक्षलग्रस्त भागाला भेट देणारे देवेंद्र फडणवीस हे पहिले मुख्यमंत्री ठरले आहेत. गुरुवारी मुख्यमंत्र्यांनी एटापल्ली तालुक्यातील बुरगी या नक्षलग्रस्त दुर्गम भागातील गावाला भेट दिली. त्यांच्या हस्ते पोलीस मदत केंद्राच्या इमारतीचे उद्घाटन करण्यात आले. बुरगी येथील मदत केंद्र उभारणीसाठी पोलीस दलाने बजावलेल्या कामगिरीचाही त्यांनी गौरवपूर्ण उल्लेख त्यांच्या भाषणात केला. यावेळी त्यांच्यासोबत अर्थमंत्री सुधीर मुनगंटीवार आणि राज्यमंत्री राजे अम्बरीशराव आत्राम होते. आतापर्यंत या भागाला एकही आमदार आणि मंत्र्यांनी यापूर्वी भेट दिलेली नव्हती, हे विशेष.
