नागपूर : लोकसत्ताचे खास प्रतिनिधी मंगेश दादाजी राऊत यांना महाराष्ट्र सरकारचा नागपूर विभागासाठीचा ग.त्र्यं. माडखोलकर उत्कृष्ट पत्रकारिता पुरस्कार जाहीर झाला आहे. या पुरस्काराचे वितरण मुख्यमंत्री देवेंद्र फडणवीस यांच्या हस्ते करण्यात येणार आहे. पत्रकारितेच्या क्षेत्रातील उत्कृष्ट कार्यासाठी महाराष्ट्र शासनाच्या वतीने दरवर्षी पुरस्कार दिले जातात. बुधवारी राज्य सरकारने २०१६ आणि २०१७ या दोन वर्षांतील पुरस्कार जाहीर केले. २०१६ या वर्षांसाठीचा नागपूर विभागाचा ग.त्र्यं. माडखोलकर पुरस्कार लोकसत्ताचे खास प्रतिनिधी मंगेश दादाजी राऊत यांना जाहीर झाला आहे. शाल, श्रीफळ, सन्मानचिन्ह, प्रमाणपत्र व ५१ हजार रुपये रोख असे पुरस्काराचे स्वरूप आहे. मंगेश राऊत यांची ‘सडक्या सुपारीची तस्करी’ ही वृत्तमालिका विशेष गाजली होती.
