१९९० साली रेल्वे तिकीट दरवाढीविरोधात तीव्र संघर्ष; तब्बल ३६ वर्षांनी काँग्रेस नेत्यांची…

देशात दळणवळणाचे सर्वात स्वस्त आणि सुरक्षित माध्यम म्हणजे भारतीय रेल्वे. दररोज करोडो प्रवासी भारतीय रेल्वेतून प्रवास करतात. रेल्वे प्रवाशांसाठी मोठा आधार आहे. दरम्यान, रेल्वेकडून भाडेवाढ करण्यात आल्याने प्रवाशांना आर्थिक भुर्दंड सहन करावा लागतो. असाच प्रकार सन १९९० मध्ये घडला होता. रेल्वे मंत्रालयाने १९९० मध्ये फलाट तिकिटाच्या दरात मोठी वाढ केली. या निर्णयाच्या विरोधात अकोला जिल्हा काँग्रेस कमिटीचे तत्कालीन जिल्हाध्यक्ष तथा माजी आमदार लक्ष्मणराव तायडे यांच्या नेतृत्वाखाली तीव्र आंदोलन छेडले. या आंदोलनावर लाठीमार करीत अनेक आंदोलकांना जखमी केले. त्यानंतर आंदोलनकर्त्यांवर विविध कायद्यांतर्गत गुन्हे दाखल करण्यात आले होते.

या प्रकरणात माजी आमदार लक्ष्मणराव तायडे, माजी महापौर मदन भरगड, तत्कालीन युवक काँग्रेस अध्यक्ष गोपाल भिरड, तसेच विलास वखरे, प्रकाश तायडे, अनंतराव बगाडे यांच्यासह अनेक काँग्रेस नेत्यांचा समावेश होता. सर्वांना निर्दोष ठरविण्यात आले. १९९० पासून सुरू असलेल्या या प्रदीर्घ न्यायालयीन लढ्यात अ‍ॅड. मंदार वखरे, अ‍ॅड. भूषण हागे आणि अ‍ॅड. ठाकूर यांनी प्रभावीपणे बाजू मांडली. जनतेच्या हक्कासाठी उभा राहिलेला हा संघर्ष आमच्या आयुष्यातील अमूल्य आठवणींचा ठेवा आहे, अशी भावना नेत्यांनी व्यक्त केली. यावेळी महेंद्र गवई, प्रशांत प्रधान, अनुराग काळपांडे यांच्यासह अनेक काँग्रेस कार्यकर्ते उपस्थित होते.

५०० आंदोलक, ५० जण जखमी

१९९० साली व्ही.पी. सिंग सरकारमध्ये रेल्वेमंत्री असलेले जॉर्ज फर्नांडिस यांनी रेल्वे फलाट तिकीटाच्या दरात दुप्पटीने वाढ करण्याचा निर्णय घेतला होता. या निर्णयाविरोधात अकोल्यातून तीव्र लढा उभारून आंदोलन छेडले. ५०० च्यावर आंदोलकांनी रेल्वेस्थानक गाठून आंदोलन केले. त्यानंतर पोलिसांनी लाठीमार केला. त्यात ५० च्यावर पदाधिकारी व कार्यकर्ते जखमी झाले होते. त्यानंतर त्याच दिवशी रात्री वाढलेले तिकीट दर मागे घेण्यात येत असल्याचे रेल्वे मंत्रालयाने जाहीर केले होते. आमचा नैतिक विजय त्याच वेळी झाला होता. आता न्यायालयाने देखील तो मान्य केल्याचा आनंद आहे, अशा भावना काँग्रेसचे तत्कालीन जिल्हाध्यक्ष तथा माजी आमदार लक्ष्मणराव तायडे यांनी व्यक्त केल्या.