वर्धा महामार्गावर वाहनांची तपासणी करीत असताना ट्रकने दिलेल्या धडकेत पोलीस शिपाई गौरव खरवडे यांचा मृत्यू झाला. समुद्रपूर तालुक्यातून जाणाऱ्या नागपूर-हैदराबाद महामार्गावरील खंडाळा शिवारात ही घटना घडली. हेही वाचा- वाशीम : ठाकरे गटाच्या महिला शहर प्रमुख रंजना पौलकर यांच्यावर चाकू हल्ला महामार्गावर वाहतूक पोलिसांकडून ट्रक थांबवून कागदपत्रांची तपासणी सुरू होती. त्यावेळी थांबलेल्या ट्रकला मागून भरधाव वेगात आलेल्या ट्रकने धडक दिली. यात ट्रकसमोर उभे असलेले खरवडे यांनाही ट्रकची धडक बसली. यात ते गंभीर जखमी झाले. त्यांना समुद्रपूरच्या ग्रामीण रुग्णालयात दाखल करण्यात आले असता डॉक्टरांनी मृत घोषित केले. या घटनेने पोलीस वर्तुळात शोककळा पसरली आहे. महामार्ग पोलीस अधीक्षक श्वेता खेडकर व अन्य वरिष्ठ माहिती मिळताच घटनास्थळी पोहचले. अपघातानंतर ट्रक दुभाजकावर चढल्याने ट्रकचालक सुनील ढोणे हेदेखील गंभीर जखमी झाले. त्यांना सेवाग्राम रुग्णालयात दाखल करण्यात आले आहे. समुद्रपूर ठाण्यात त्यांच्यावर गुन्हा दाखल करण्यात आला आहे.
