Vaibhav Lahane : अकोला जिल्ह्यातील जवानाला जम्मू-काश्मीरमध्ये वीरमरण, कुपवाडामध्ये कर्तव्य बजावत असताना…

जिल्ह्यातील वैभव लहाने हे सैन्यदलात होते. जम्मू काश्मिरमधील कुपवाडा येथे कर्तव्य बजावत असतांना त्यांना वीरमरण आले. ७ जानेवारी रोजी ते शहीद झाले. ‘१२ मराठा लाइट इन्फंट्री’ या युनिटमध्ये ते होते. देश सेवा देत असतांना त्यांना वीरगती प्राप्त झाली. त्यांचे पार्थिव श्रीनगरवरून दिल्ली येथे व पुढे विशेष विमानाने ९ जानेवारीला सकाळी ८ वाजता नागपूर येथे आणले जाईल.

वीरजवानाचे मूळ गाव कपिलेश्वर (पो. वडद, ता. अकोला) आहे. दुपारी १ वाजेपर्यंत त्यांचे पार्थिक गावात आणले जाईल. त्यांना मानवंदना देऊन मूळ गावात अंत्यसंस्कार केले जाणार आहे, अशी माहिती जिल्हा सैनिक कल्याण विभागाकडून देण्यात आली.

जीवाची परवा न करता कर्तव्य बजावत असताना जवान वैभव लहाने यांना वीर गती प्राप्त झाली. अकोला जिल्ह्यातील कपिलेश्वर गावाचे ते सुपूत्र होते. मूळ गावी सैनिकी सन्मानामध्ये अंत्यसंस्कार होणार आहेत. सर्व आजी-माजी सैनिकांनी वीर शहीद जवानाला श्रद्धांजली देण्यासाठी उपस्थित रहावे, असे आवाहन देशभक्त आजी माजी सैनिक सेवाभावी संस्थेचे अध्यक्ष डॉ. मनोहर चव्हाण यांनी केले.

घटनेबाबत अस्पष्टता

अकोला जिल्ह्यातील जवान वैभव लहाने यांना जम्मू काश्मीरमधील कुपवाडा येथे वीरमरण प्राप्त झाल्याचे सैनिक कल्याण विभागाकडून सांगण्यात आले. मात्र, नेमकी घटना कशी घडली, याबाबत सध्या अस्पष्टता आहे. प्रशासनाकडे या संदर्भात कुठलीही माहिती उपलब्ध नाही. दुर्गम भागात घटना असल्याने संपर्क होत नाही. शिवाय सुरक्षेचा प्रश्न असल्याने गोपनीयता ठेवली जात असल्याची माहिती आहे.

‘देश संरक्षणाचे महान कार्य अमर राहील’

अकोला जिल्ह्यातील जवान देश सेवेमध्ये नेहमीच पुढाकार घेत असतात. अनेक सैनिक आपल्या प्राणाची आहुती देऊन देश संरक्षणाचे महान कार्य करतात. शहीद लहाने यांचे देशसेवा करताना निधन हे दुःखदायी असून त्यांचे कार्य, सेवा सदैव अमर राहील, अशा शब्दात खासदार अनुप धोत्रे यांनी शोकसंवेदना व्यक्त केली. शहीद लहाने यांचे दु:खद निधनाचे वृत्त वेदनादायी आहे. देश सेवेसाठी त्यांचे योगदान कायम स्मरणात राहील, अशा शब्दात आमदार रणधीर सावरकर यांनी श्रद्धांजली अर्पण केली.