अमरावती : जिल्ह्यातील परतवाडा येथील लैंगिक शोषण प्रकरणी अनेक धक्कादायक गोष्टी आता समोर येऊ लागल्या आहेत. या प्रकरणी अयान अहमद तन्वीर या १९ वर्षीय तरूणाला पोलिसांनी अटक केल्यानंतर तपासादरम्यान मिळालेल्या माहितीच्या आधारे उजेर खान इकबाल खान, तरबेज खान तस्लिम खान आणि मोहम्मद साद मोहम्मद सादिक या तिघांनाही पोलिसांनी बेड्या ठोकल्या.
आतापर्यंत चार आरोपींना अटक करण्यात आली आहे. मुख्य आरोपी अयान अहमद हा कोणताही काम न करणारा ‘रोड रोमिओ’. महागड्या कारमधून फिरणे आणि मोबाईलवर रील बनवणे हाच त्याचा दिनक्रम होता, अशी माहिती समोर आली आहे. त्याच्याकडे महागड्या गाड्या कोठून येत होत्या, याचीही चर्चा आता रंगली आहे.
वडिलांचा व्यवसाय काय?
अयान अहमदच्या वडिलांचा जुन्या कार खरेदी विक्रीचा व्यवसाय आहे. ‘ऑटो डील’च्या व्यवसायातूनच त्याच्या कुटुंबीयांचा उदरनिर्वाह चालतो. यातील महागड्या कार अयान आपले शौक पूर्ण करण्यासाठी वापरत होता, अशी माहिती समोर येत आहे. कार घेऊन भटकंती करणे, तरूणींसमोर बडेजाव दाखवणे, समाज माध्यमांवर संपर्क साधून त्यांना प्रेमाच्या जाळ्यात ओढणे आणि नंतर त्यांचे लैंगिक शोषण करणे ही त्याची कार्यपद्धती होती. तरूणींसोबत आक्षेपार्ह व्हिडिओ तयार करण्याचे आणि आपल्या मित्रांसोबत शेअर करण्याचा त्याचा छंद हा वाढला, त्यातूनच तरूणींना ब्लॅकमेल करण्याचे प्रयत्न आरोपी अयानने सुरू केले, अशी माहिती आता समोर येऊ लागली आहे.
गुन्ह्याची व्याप्ती वाढणार
आरोपींनी आठ अल्पवयीन मुली आणि महिलांचे १८ व्हिडिओ आणि ३९ फोटो समाज माध्यमांवर प्रसारीत केल्याचे तपासात समोर आले आहे. पोलिसांनी आता या गंभीर गुन्ह्याच्या तपासासाठी विशेष तपास पथकाची स्थापना केली आहे. आतापर्यंत पीडित किंवा त्यांचे पालक यांपैकी कुणीही पोलिसांत तक्रार देण्यास समोर आले नसले, तरी पोलिसांनी तपासाचा परीघ वाढवला आहे. या गुन्ह्यात आणखी किती लोकांचा सहभाग आहे, याचा शोध घेतला जात आहे. सायबर पोलिसांनीही या प्रकरणाची पाळेमुळे शोधण्याचा प्रयत्न चालवला आहे.
पोलिसांसोबत संपर्क करण्याचे आवाहन
या प्रकरणातील पीडिता व त्यांच्या कुटुंबीयांनी पोलीस प्रशासनातर्फे प्रसारित करण्यात आलेल्या मोबाइल क्रमांकावर संबंधित महिला पोलीस अधिकाऱ्यांशी आपल्या सोयीनुसार संपर्क साधून माहिती द्यावी. सोबतच या प्रकरणाबाबत कुणाला काहीही माहिती असल्यास त्यांनी पोलिसांशी संपर्क साधावा, असे आवाहन पोलीस अधीक्षकांनी केले आहे.
