अमरावती विभागाचा बारावीचा निकाल ९१.४३ टक्के…उत्तीर्णतेच्या टक्केवारीत राज्यात जे स्थान मिळाले ते बघून तर…

निकालाच्या टक्केवारीत विभागात गेल्यावर्षी प्रमाणे यंदाही वाशीम जिल्ह्याने अव्वल स्थान मिळवले असून या जिल्ह्याचा निकाल ९५.६६ टक्के, बुलढाणा ९५.१८, अमरावती ९१.०५, यवतमाळ ९०.६३ तर अकोला जिल्ह्याचा निकाल सर्वात कमी ८४.२८ टक्के लागला आहे.

मार्च २०२५ मध्ये घेण्यात आलेल्या बारावीच्या परीक्षेसाठी अमरावती विभागातून एकूण १ लाख ४६ हजार १४८ विद्यार्थ्यांनी नोंदणी केली होती. प्रत्यक्षात १ लाख ४५ हजार २५७ विद्यार्थ्यांनी परीक्षा दिली. एकूण १ लाख ३२ हजार ८१४ विद्यार्थी उत्तीर्ण झाले. उत्तीर्णतेची टक्केवारी ९१.४३ इतकी आहे.

अमरावती विभागाचा विज्ञान शाखेचा निकाल ९७.६९ टक्के, कला शाखेचा ८२.८८ टक्के, वाणिज्य शाखेचा ९२.०४ टक्के तर व्यवसाय अभ्यासक्रमाचा निकाल ७५.८८ टक्के तर तंत्रज्ञान-विज्ञान शाखेचा निकाल ९१.९५ टक्के इतका लागला आहे.

यंदाही मुलींचाच वरचष्मा

उत्तीर्णतेच्या बाबतीत यंदा देखील मुलींनीच बाजी मारली आहे. अमरावती विभागातून एकूण ६७ हजार १८८ मुलींनी परीक्षा दिली, त्यापैकी ६३ हजार ३५२ विद्यार्थिनी उत्तीर्ण झाल्या. हे प्रमाण ९४.२९ टक्के आहे, तर ७८ हजार ६९ मुलांनी परीक्षा दिली, त्यापैकी ६९ हजार ४६२ मुले उत्तीर्ण झाले. मुलांच्या उत्तीर्णतेची टक्केवारी ही ८८.९७ इतकी आहे.

गुणपडताळणीची सोय

विद्यार्थ्यास गुणपडताळणी आणि उत्तरपत्रिकांच्या छायाप्रती, पुनर्मूल्यांकनासाठी संबंधित विभागीय मंडळाकडे ऑनलाईन पद्धतीने मंडळाच्या अधिकृत संकेतस्थळवरून स्वत: किंवा कनिष्ठ महाविद्यालयामार्फत अर्ज करण्याची सोय उपलब्ध करून देण्यात आली आहे. गुणपडताळणीसाठी आणि उत्तरपत्रिका छायाप्रतीसाठी ६ मे ते २० मे २०२५ पर्यंत अर्ज ऑनलाईन पद्धतीने करता येणार आहे.

अमरावती विभागाचा जिल्हानिहाय निकाल

वाशीम : ९५.६६ टक्के
बुलढाणा : ९५.१८ टक्के
अमरावती ९१.०५ टक्के
यवतमाळ : ९०.६३ टक्के
अकोला : ८४.२८
एकूण : ९१.४३ टक्के

शाखानिहाय निकाल

विज्ञान : ९७.६९ टक्के
वाणिज्य : ९२.०४ टक्के
कला : ८२.८८ टक्के
व्यवसाय अभ्यासक्रम : ७५.८८ टक्के
तंत्रज्ञान-विज्ञान : ९१.९५ टक्के