चंद्रपूर जिल्ह्यात काँग्रेसला आणखी एक धक्का, माजी आमदार डॉ. वारजूकर यांचा गुरूवारी भाजप प्रवेश

वारजूकर कुटूंबाच्या या निर्णयामुळे जिल्ह्यात काँग्रेसला जबर धक्का बसला आहे. दरम्यान एकमेकांचे कट्टर स्पर्धक असलेले आमदार किर्तीकुमार भांगडीया व डॉ.वारजूकर एकत्र आल्याने आगामी जिल्हा परिषद निवडणुकीत भाजपला सुगीचे दिवस आहेत.

चिमूर विधानसभा मतदार संघाचे काँग्रेसचे माजी आमदार डॉ.अविनाश वारजूकर, माजी जिल्हा परिषद अध्यक्ष तथा २०१९ व २०२४ अशा सलग दोन निवडणुकीत चिमूर विधानसभा मतदार संघातून काँग्रेसचे उमेदवार राहिलेले डॉ. सतिश वारजूकर मागील काही दिवसांपासून अस्वस्थ होते. विधानसभा निवडणुकीत सातत्याने होत असलेला पराभव आणि काँग्रेस पक्षातील गटबाजीमुळेच होत असलेला पराभव वारजूकर कुटूंबियांच्या चांगलाच जिव्हारी लागला होता. त्यातच काँग्रेस पक्षातील गटबाजी आता रस्त्यापर्यंत आलेली आहे. त्यामुळे या पक्षाला आगामी जिल्हा परिषद निवडणुकीतही भविष्य नाही.

जिल्हा परिषदेचे शंकरपूर-भिसी क्षेत्रही हातातून निघून जावू नये नेमकी हिच बाब लक्षात घेवून वारजूकर कुटूंबाने एकत्र येत भारतीय जनता पक्षात प्रवेश् करण्याचा निर्णय घेतला. त्यानुसार आज मुंबईत आम्ही संपूर्ण वारजूकर कुटूंबियांनी मुख्यमंत्री फडणवीस यांची भेट घेतली. उद्या गुरूवार २६ फेब्रुवारी रोजी भाजपच्या मुंबई कार्यालयात अधिकृत पक्ष प्रवेश होणार असल्याचे डॉ.वारजूकर यांनी लोकसत्ताशी बोलतांना सांगितले. दरम्यान डॉ. वारजूकर यांच्या या निर्णयामुळे काँग्रेस पक्षाला जबर धक्का बसला आहे. चिमूर विधानसभा मतदार संघात काँग्रेस पक्ष पूर्णत: खिळखिळा झाला आहे. यासंदर्भात अधिक बोलतांना डॉ.सतिश वारजूकर म्हणाले, या जिल्ह्यात काँग्रेस पक्षात मागील काही वर्षात उघड गटबाजी बघायला मिळत आहे.

महापालिका निवडणुकीत खासदार प्रतिभा धानोरकर यांनी विधीमंडळ नेते विजय वडेट्टीवार समर्थकांनी शिवानी वडेट्टीवार हिच्यासाठी दिल्लीवारी केल्याने ९ नगरसेवकांची उमेदवारी कापली. त्यानंतर महापालिकेत सर्वाधिक २७ नगरसेवक निवडुन आल्यानंतरही महापौर व उपमहापौर पदाची निवडणुक जिंकण्यात अपयश आले. सत्तेच्या जवळ असतांना काँग्रेस केवळ गटबाजीमुळे काँग्रेस पक्षाने महापालिकेतील सत्ता गमावली. चंद्रपूर जिल्हा मध्यवर्ती सहकारी बँकेतही काँग्रेस पक्षाला हमखास विजयाची हमी असतांना येथे काँग्रेसचा दारूण पराभव झाला. त्यालाही गटबाजी कारणीभूत आहे. विधानसभा निवडणुकीतही जिल्ह्यातील सहा पैकी पाच जागा काँग्रेसने गटबाजीमुळे गमावल्या.

काँग्रेस पक्षाच्या गटबाजीचा हा मागील दोन वर्षाचा आलेख बघता येत्या काळात ही गटबाजी वाढत जाणार आहे. महापालिकेतील नगरसेवक ज्याप्रमाणे धानोरकर व वडेट्टीवार गटात विभागले गेले तिच स्थिती आगामी जिल्हा परिषद निवडणुकीतही बघायला मिळणार आहे. त्यामुळे या पक्षात आता भविष्य नाही त्यामुळेच मुख्यमंत्री देवेंद्र फडणवीस यांच्या नेतृत्वात भाजपात प्रवेश घेणार असल्याची माहिती माजी जिल्हा परिषद अध्यक्ष डॉ.सतिश वारजूकर यांनी लोकसत्ताशी बोलतांना दिली.