नागपूर : बल्लारशाहहून नागपूरकडे येणाऱ्या बेंगळुरू-हजरत निजामुद्दीन राजधानी एक्स्प्रेसचे गुमगावजवळ इंजिन बिघाडल्याने गाडी पाच वाजेपर्यंत नागपूरला पोहोचू शकली नाही. प्रवाशांचे हाल झाले. अखेर मालगाडीचे इंजिन लावून गाडी नागपूरला आणण्यात आली. रेल्वे प्रशासनाची धावपळ उडाली.
गुमगावजवळ इंजिन बिघाड
बल्लारशाहहून दुपारी १२.१५ वाजता नागपूरकडे रवाना झालेली २२६९१ बेंगळुरू–हजरत निजामुद्दीन राजधानी एक्स्प्रेस नियोजित वेळेनुसार दुपारी २.५५ वाजता नागपूर स्थानकात पोहोचणे अपेक्षित होते. मात्र गुमगावजवळ पोहोचताच इंजिनमध्ये अचानक बिघाड झाला. यामुळे तात्काळ थांबवण्यात आले. अचानक गाडी थांबल्यामुळे प्रवाशांमध्ये सुरुवातीला संभ्रमाचे वातावरण निर्माण झाले. काही काळ नेमके काय झाले, याची माहिती न मिळाल्याने प्रवाशांची चिंता वाढली होती.
वेळापत्रक कोलमडले
या अनपेक्षित बिघाडाचा थेट परिणाम गाडीच्या वेळापत्रकावर झाला. नियोजित वेळेनुसार नागपूरला पोहोचणारी ही गाडी सायंकाळी पाच वाजेपर्यंतही स्थानकात दाखल झाली नव्हती. परिणामी दिल्लीकडे होणारे पुढील प्रस्थानही उशिराने झाले. राजधानीसारख्या महत्त्वाच्या आणि वेळेचे काटेकोर पालन करणाऱ्या गाडीच्या वेळापत्रकात झालेल्या या बदलामुळे इतर गाड्यांच्या वेळांवरही परिणाम होण्याची शक्यता निर्माण झाली होती.
प्रवाशांचे हाल, संताप
गाडी बराच वेळ एका ठिकाणी थांबून राहिल्याने प्रवाशांना अनेक अडचणींना सामोरे जावे लागले. प्रवाशांना उकाड्याचा त्रास जाणवू लागला. पिण्याच्या पाण्याची उपलब्धता मर्यादित झाली होती, तर अन्नपुरवठाही विस्कळीत झाला. लहान मुले, ज्येष्ठ नागरिक आणि आजारी प्रवाशांना विशेष त्रास सहन करावा लागला. माहितीचा अभाव आणि विलंब यामुळे काही प्रवाशांनी रेल्वे प्रशासनावर नाराजी व्यक्त केली.
मालगाडी इंजिनची मदत
घटनेची माहिती मिळताच मध्य रेल्वेच्या नागपूर येथील नियंत्रण कक्षाने तातडीने हालचाली सुरू केल्या. परिस्थितीचे गांभीर्य लक्षात घेऊन पर्यायी इंजिनची व्यवस्था करण्यात आली. जवळच्या स्थानकावरून मालगाडीचे इंजिन पाठवण्यात आले आणि ते राजधानी एक्स्प्रेसला जोडण्यात आले. त्यानंतर गाडी हळूहळू नागपूरकडे मार्गस्थ करण्यात आली. अखेर उशिराने का होईना, गाडी नागपूरला पोहोचली.
