शंकराच्या मूर्तीची विटंबना, नागरिक संतप्त; तिसऱ्यांदा घडली घटना…

पवनी तालुक्यातील भावड येथे भगवान शंकरजी देवस्थान आहे. आज सकाळी भाविक दर्शनासाठी गेले असता त्यांना भगवान शंकराच्या मूर्तीची तोडफोड केली गेली असल्याचे लक्षात आले. चेहरा आणि दोन्ही हाताला पूर्णपणे विद्रूप करण्यात आले होते. याची माहिती पसरताच ग्रामस्थ आणि परिसरातील नागरिकांनी मंदिराकडे धाव घेतली.

नागरिकांमध्ये प्रचंड संताप असल्याने अड्याळ पोलीस ठाण्याचे अधिकारी तेथे दाखल झाले. यापूर्वीही दोनदा याच मंदिरात शंकराच्या मूर्तीची विटंबना करण्यात आली होती. तिसऱ्यांदा हा प्रकार घडल्याने नागरिक चांगलेच आक्रमक झाले. मूर्तीची विटंबना करणाऱ्यांना तातडीने अटक करा, अशी मागणी त्यांनी लावून धरली. दरम्यान, परिस्थितीचे गांभीर्य लक्षात घेता पोलीस अधीक्षक नुरुल हसन आणि अन्य अधिकारी दाखल झाले होते. आमदार नरेंद्र भोंडेकरसुद्धा घटनास्थळी आले. त्यांनी पोलीस प्रशासनासोबत चर्चा केली.

या घनटेच्या निषेधार्थ ‘रास्ता रोको’ आंदोलनही करण्यात आले. या प्रकरणातील आरोपींना ताबडतोब अटक करावी, या मागणीसाठी उद्या, रविवारी भावड ते अड्याळ पोलीस ठाण्यापर्यंत मोर्चा काढण्यात येणार असल्याचे समजते.

हिंदूंच्या आस्थांवर हल्ले खपवून घेणार नाही : आमदार भोंडेकर

वारंवार देवी देवतांच्या मूर्तींचा अपमान आम्ही सहन करणार नाही. हिंदूंच्या आस्थांवर हल्ले आम्ही खपवून घेणार नाही. या प्रकरणातील आरोपींना तत्काळ अटक न झाल्यास उद्या सकाळी १० वाजता अड्याळ पोलीस ठाण्यासमोर तीव्र आंदोलन करू, असा इशारा शिवसेनेचे आमदार नरेंद्र भोंडेकर यांनी दिला. यावेळी शिवसेना लोकसभा संपर्क प्रमुख संजय कुंभलकर, उपजिल्हाप्रमुख सुरेश धुर्वे, पवनी तालुका प्रमुख प्रशात भूते, किशोर पंचभाई, आशीष माटे, राजेंद्र ब्राह्मणकर, उपसभापती प्रमोद मेन्ढे, जितेश लिचडे, नेताजी नागरिकर, नाना उपरीकर आदी उपस्थित होते.