भंडारा : जिल्ह्यातील साकोली तालुक्यातील बहुचर्चित भेल प्रकल्प तब्बल १३ वर्षांपासून रखडलेला असून, रोजगाराच्या आशेने जमीन दिलेल्या शेतकऱ्यांचा संताप आता टोकाला पोहोचला आहे.
येत्या १३ मे रोजी प्रकल्पाच्या ठिकाणी ‘१३ वी पुण्यतिथी’ विधिवत साजरी करून कारणीभूत लोकप्रतिनिधींना प्रतीकात्मक श्रद्धांजली अर्पण करण्याचा इशारा भेल संघटनेच्या वतीने देण्यात आला आहे. या पार्श्वभूमीवर समाज माध्यमांवर व्हायरल झालेल्या पोस्टची जोरदार चर्चा सुरू आहे.
राजकीय उदासीनतेचा फटका
एकेकाळी जिल्ह्याच्या औद्योगिक विकासाचा कणा ठरण्याची अपेक्षा असलेला भेल प्रकल्प आजही केवळ कागदावरच अडकून पडला आहे. तब्बल ६०० एकर जमीन भूसंपादनासाठी देणाऱ्या शेतकऱ्यांच्या स्वप्नांवर अक्षरशः पाणी फिरले आहे. ६०० एकर जमीन देणाऱ्या शेतकऱ्यांच्या आशा धुळीस मिळाल्या असून, विकासाच्या घोषणा केवळ आश्वासनांपुरत्याच मर्यादित राहिल्या आहेत. रोजगार, उद्योग आणि विकासाच्या गाजावाज्यातून उभा राहणारा हा प्रकल्प आता ओसाड वास्तवात बदलला आहे.
६०० एकर जमीन आजही ओसाड
प्रकल्पासाठी संपादित करण्यात आलेली सुमारे ६०० एकर जमीन आजही निष्प्रयोजन पडून आहे. भेल कंपनी गुंतवणुकीस तयार असल्याचे वारंवार सांगितले जात असतानाही, काही माजी लोकप्रतिनिधींनी राजकीय स्वार्थातून हा प्रकल्प जाणीवपूर्वक रखडवला, असा गंभीर आरोप स्थानिक नागरिक आणि शेतकरी करत आहेत.
स्थानिकांमध्ये तीव्र असंतोष
गेल्या १३ वर्षांत प्रकल्पाबाबत कोणतीही ठोस प्रगती न झाल्याने स्थानिकांमध्ये प्रचंड नाराजी निर्माण झाली आहे. रोजगाराच्या संधी हिरावल्या गेल्यामुळे युवकांमध्ये संताप असून, जिल्ह्याच्या औद्योगिक प्रगतीलाही मोठा फटका बसला आहे.
प्रकल्प रखडण्यामागील कारणे..
-माजी लोकप्रतिनिधींचा कथित विरोध
-प्रशासकीय पातळीवर ठोस पाठपुराव्याचा अभाव
-स्थानिक स्तरावर समन्वयाची कमतरता
-राजकीय स्वार्थासाठी प्रकल्पाला अडथळे
१३ मे रोजी ‘पुण्यतिथी’ कार्यक्रम..
भेल संघटनेतर्फे १३ मे २०२६ रोजी प्रकल्पाच्या ठिकाणी ‘१३ वी पुण्यतिथी’ साजरी करण्यात येणार आहे. या वेळी प्रकल्पाला खीळ घालणाऱ्या लोकप्रतिनिधींना प्रतीकात्मक श्रद्धांजली अर्पण केली जाणार आहे.
आंदोलनाचा इशारा
“मुर्दाड लोकप्रतिनिधींनी आता तरी जागे व्हावे, अन्यथा तीव्र आंदोलन उभारले जाईल,” असा इशारा भेल संघटनेने दिला आहे. जिल्ह्याच्या विकासासाठी शांततापूर्ण पण ठाम लढा सुरूच ठेवण्याचा निर्धारही व्यक्त करण्यात आला आहे. १३ वर्षांपासून रखडलेल्या या प्रकल्पामुळे साकोलीत विकासाची गाडी थांबलेली असताना, १३ मेचा हा कार्यक्रम प्रशासन आणि लोकप्रतिनिधींना जाग आणतो का, याकडे संपूर्ण जिल्ह्याचे लक्ष लागले आहे.
