अकोला : रेल्वे इंजिन चालक अर्थात लोको पायलट यांच्यावर अत्यंत महत्त्वपूर्ण जबाबदारी असते. लोको रनिंग श्रेणीतील रिक्त पदांचा मुद्दा २०१९ पासून प्रलंबित होता. भुसावळ मंडळाने विभागीय निवडीद्वारे ११२ सहाय्यक लोको पायलट पदे भरून लोको रनिंग श्रेणीतील दीर्घकाळापासून प्रलंबित प्रश्न सोडवला. कमी वेळेत निवड प्रक्रिया पूर्ण करणारे पहिले मंडळ होण्याचा मान भुसावळने प्राप्त केला. लोको पायलट यांच्या मार्गदर्शनात आता तरुण सहायक लोको पायलट यांच्या हातात रेल्वे इंजिनची धुरा राहणार आहे विभागीय कोट्यातून या पदांची भरती करण्याचे प्रयत्न करण्यात आले.
मात्र, पात्रता संबंधित अटींमुळे निवड प्रक्रिया फक्त टीआरएस श्रेणीतील तंत्रज्ञांपुरती मर्यादित होती. परिणामी, ३१ मे २०२३ रोजी १७५ सहाय्यक लोको पायलट पदांसाठी एक अधिसूचना जारी केली गेली, मात्र त्या प्रक्रियेत केवळ दोन उमेदवारांची निवड झाली. भुसावळ मंडळाने समस्येचे निराकरण करण्यासाठी सक्रिय पावले उचलली. ८ एप्रिल २०२४ रोजी रेल्वे मंडळाने शिथिलता दिली, ज्याद्वारे सर्व विभागीय कर्मचारी जे आवश्यक पात्रता पूर्ण करतात, ते सहाय्यक लोको पायलट पदांसाठी अर्ज करू शकतात.
या शिथिलतेसह १६ मे २०२४ रोजी १७३ लोको पायलट पदांसाठी नवीन अधिसूचना जारी केली. एकूण ९२३ उमेदवारांनी विविध विभागांसारख्या इंजिनियरिंग, सिग्नल आणि टेलीकॉम, ऑपरेटिंग, इलेक्ट्रिकल (सामान्य) आणि टीआरडी विभागांमधून या पदांसाठी अर्ज केला. २८ जुलै रोजी घेतलेल्या लेखी परीक्षेत १६१ उमेदवार उत्तीर्ण झाले. वैद्यकीय परीक्षा तातडीने पूर्ण केली. त्यानंतर २३ ते २६ सप्टेंबरदरम्यान मनोवैज्ञानिक परीक्षण घेण्यात आले. १६१ उमेदवारांपैकी ज्यांनी दोन्ही मनोवैज्ञानिक परीक्षण आणि वैद्यकीय परीक्षा उत्तीर्ण केली, त्यांना प्रारंभिक सहाय्यक लोको पायलट प्रशिक्षणासाठी १३१ उमेदवारांना झोनल प्रशिक्षण केंद्र येथे पाठविण्यात आले. ते १ एप्रिल रोजी संपले.
प्रशिक्षण यशस्वीपणे पूर्ण केल्यानंतर ११२ योग्य सहाय्यक लोको पायलटसाठी ३ एप्रिल रोजी नियुक्ती आदेश जारी केले गेले. नवीन प्रशिक्षित सहायक लोको पायलटसाठी भुसावल मंडळ प्रशिक्षण केंद्रात एक परिचयात्मक सत्र आयोजित करण्यात आले. या सत्रात विभागीय रेल्वे व्यवस्थापक इति पांडे, अपर विभागीय रेल्वे व्यवस्थापक (प्रशासन) सुनील कुमार सुमन, वरिष्ठ विभागीय विद्युत अभियंता, टीआरओ आणि वरिष्ठ विभागीय परिचालन व्यवस्थापक यांची उपस्थिती होती.
