भाजप नेत्यासह तिघांची जिवंत जाळून हत्या; छत्तीसगडमध्ये वाळू माफियांचा हैदोस, फॉर्च्युनर कार पेटवली…

सोहनत पोलीस ठाण्याच्या हद्दीतील नोगई गावाजवळ ही घटना घडली. भारत सिंह हे जनपद पंचायतचे माजी अध्यक्ष तसेच भाजपचे स्थानिक नेते होते. प्राथमिक माहितीनुसार, संबंधित परिसरातील वाळू उत्खननाचे कंत्राट भारत सिंह यांच्या कुटुंबाकडे होते. दुसरीकडे, वाळू वाहतूक करणाऱ्या वाहनांचा व्यवसाय त्रिपाठी कुटुंबाकडे असल्याचे सांगितले जाते. या दोन्ही गटांमध्ये गेल्या काही महिन्यांपासून आर्थिक व्यवहार आणि व्यवसायावरील नियंत्रणाच्या मुद्द्यावरून वाद सुरू होता.

मंगळवारी रात्री भारत सिंह हे आपल्या सहकाऱ्यांसह फॉर्च्युनर वाहनाने प्रवास करत असताना हल्लेखोरांनी त्यांचा पाठलाग केल्याचे सांगितले जाते. त्यानंतर वाहनाच्या पुढे आणि मागे ट्रक उभे करून त्यांचा मार्ग रोखण्यात आला. वाहनाला बाहेर पडण्याचा कोणताही मार्ग न राहिल्याने हल्लेखोरांनी त्यावर ज्वलनशील पदार्थ टाकून आग लावल्याचा आरोप आहे.

हल्लेखोरांकडून मारहाण

या आगीत भारत सिंह यांचा वाहनातच होरपळून मृत्यू झाला. वाहनातील इतरांनी जीव वाचविण्यासाठी बाहेर पडण्याचा प्रयत्न केला. मात्र, बाहेर पडलेल्या व्यक्तींवर हल्लेखोरांनी मारहाण केल्याचे तपासातून समोर आले आहे. या घटनेत शिक्षक नागेंद्र सिंह आणि वीरेंद्र सिंह यांचाही मृत्यू झाला. वीरेंद्र सिंह यांच्या गळ्यावर धारदार शस्त्राने वार झाल्याचे सांगितले जात असून त्यांना उपचारासाठी रुग्णालयात दाखल करण्यात आले होते; मात्र उपचारादरम्यान त्यांची प्राणज्योत मालवली.

परिसरात तणावाचे वातावरण

घटनेची माहिती मिळताच पोलिसांनी घटनास्थळी धाव घेतली. तिहेरी हत्याकांडानंतर परिसरात तणावाचे वातावरण निर्माण झाले असून आरोपींचा शोध घेण्यासाठी विशेष पथके नियुक्त करण्यात आली आहेत. या प्रकरणाचा तपास सुरू असून वाळू व्यवसायाशी संबंधित गुन्हेगारी कारवायांबाबत पुन्हा एकदा प्रश्नचिन्ह उपस्थित झाले आहे.