Buldhana Job Fair : २०० उमेदवारांना जागीच नोकरी; ५५० जणांची प्राथमिक निवड…

या मेळाव्याला जिल्ह्यातील तरुणांनी प्रचंड प्रतिसाद दिला. एकूण ३३ नामांकित कंपन्यांनी या ठिकाणी १७०० उमेदवारांच्या मुलाखती घेतल्या. त्यापैकी ५५० जणांची प्राथमिक निवड करण्यात आली, तर २०० उमेदवारांना जागीच नोकरीचे नियुक्तीपत्र देण्यात आले. यावेळी प्रमुख पाहुणे म्हणून उपायुक्त द. ल. ठाकरे यांनी तरुणांना मार्गदर्शन केले.

तरुणांनी केवळ नोकरीवर अवलंबून न राहता, मिळालेल्या अनुभवातून भविष्यात स्वतःचे उद्योग सुरू करून उद्योजक बनले पाहिजे. ‘बोर्ड ऑफ अप्रेंटिसशिप’चे संचालक जुमले यांनी शिकाऊ उमेदवारी योजनेचे महत्त्व समजावून दिले.

माऊली ग्रुपचे अध्यक्ष ज्ञानेश्वर पाटील यांनी अध्यक्षीय भाषणात सांगितले की, आमची संस्था बेरोजगार तरुणांना मदत करण्यासाठी आणि कौशल्य विकासाचे कार्यक्रम राबवण्यासाठी नेहमीच तत्पर आहे. प्राचार्य डॉ. जाधव यांनीही यावेळी महाविद्यालयाच्या सामाजिक भूमिकेबद्दल माहिती दिली.

हा मेळावा यशस्वी करण्यासाठी प्रशिक्षण अधिकारी तुषार बढे, जिल्हा कौशल्य विकास कार्यालयाचे सहाय्यक आयुक्त ग. प्र. बिटोडे आणि त्यांच्या सहकाऱ्यांनी परिश्रम घेतले.