मटणाच्या भाजीवरून वाद; कुऱ्हाडीचे घाव घालून लहान भावाची हत्या

उरलेल्या मटणाच्या भाजीवरून वादाची ठिणगी

पोलिसांनी दिलेल्या माहितीनुसार, जगन, रमेश आणि त्यांचा दिव्यांग भाऊ किशोर हे तिघे भाऊ एकत्र राहत होते. रक्षाबंधनानिमित्त बहीण घरी आल्याने तिच्या स्वागतासाठी मटणाचा बेत करण्यात आला होता. बहीण राखी बांधून परतल्यानंतर सायंकाळी उरलेल्या मटणाच्या भाजीवरून जगन आणि रमेश यांच्यात वाद सुरू झाला.

दोघांनीही मद्यप्राशन केले असल्याने किरकोळ कारणावरून सुरू झालेला वाद काही वेळातच विकोपाला गेला. संतापलेल्या जगनने घरातील कुऱ्हाड हातात घेत रमेश यांच्या डोक्यावर आणि मानेवर प्राणघातक वार केले. गंभीर दुखापत झाल्याने रमेश रक्ताच्या थारोळ्यात कोसळले. त्यांचा घटनास्थळीच मृत्यू झाला.

पोलिसांची घटनास्थळी धाव

घटनेची माहिती मिळताच भिसी पोलिसांसह शंकरपूर चौकीतील पोलिसांनी तातडीने घटनास्थळी धाव घेतली. पंचनामा करून मृतदेह ताब्यात घेण्यात आला. त्यानंतर आरोपी जगन बनकर याला पोलिसांनी ताब्यात घेत अटक केली. दरम्यान, किरकोळ कारणावरून सख्ख्या भावानेच भावाचा जीव घेतल्याने शंकरपूर परिसरात हळहळ व्यक्त होत आहे. या प्रकरणाचा पुढील तपास भिसी पोलीस करीत आहेत. लहान भावाची हत्या