नागपूर : चंद्रपूर महापालिकेतील काँग्रेसमधील अंतर्गत संघर्ष पुन्हा उफाळून आला असून खासदार प्रतिभा धानोरकर समर्थक नगरसेवकांनी गटनेता बदलण्याच्या मागणीसाठी मंगळवारी नागपूर विभागीय आयुक्तांची भेट घेतली. त्यामुळे पक्षातील वडेट्टीवार-धानोरकर संघर्ष पुन्हा चर्चेत आला आहे.
गटनेता बदलासाठी धानोरकर समर्थक आक्रमक
चंद्रपूर महापालिकेतील काँग्रेस गटातील वाद पुन्हा एकदा उफाळून आला आहे. खासदार प्रतिभा धानोरकर गटातील नगरसेवकांनी मंगळवारी नागपूर विभागीय आयुक्त कार्यालयात जाऊन गटनेता बदलण्याची मागणी केली. काँग्रेसच्या महापालिका गटाचे नेतृत्व विजय वडेट्टीवार समर्थकांकडे राहू नये, अशी भूमिका धानोरकर समर्थकांनी घेतल्याचे समजते. त्यामुळे पक्षांतर्गत मतभेद मिटल्याचा दावा फोल ठरत असल्याचे चित्र निर्माण झाले आहे.
दिल्लीतील तोडग्यानंतरही वाद कायम
चंद्रपूर महापालिकेतील सत्तावाटपावरून खासदार प्रतिभा धानोरकर आणि काँग्रेसचे विधिमंडळ पक्षनेते विजय वडेट्टीवार यांच्यातील वर्चस्वाच्या संघर्षाने काही महिन्यांपूर्वी टोक गाठले होते. हे प्रकरण अखेर पक्षश्रेष्ठींपर्यंत पोहोचल्यानंतर दिल्लीमध्ये समन्वयाचा फॉर्म्युला ठरविण्यात आला होता. त्यानुसार सत्तापक्ष नेतेपद आणि उपमहापौरपद वडेट्टीवार समर्थकांकडे, तर महापौरपद धानोरकर गटाकडे राहणार असल्याचे निश्चित करण्यात आले होते. तसेच स्थायी समिती अध्यक्षपद शिवसेना (ठाकरे) आणि बहुजन वंचित आघाडीच्या गटाला देण्याचे ठरले होते.
राजेश अडूर यांच्या नियुक्तीवरून नाराजी
दिल्लीतील बैठकीनंतर काँग्रेस गटनेतेपदी विजय वडेट्टीवार समर्थक राजेश अडूर यांची नियुक्ती करण्यात आली. तसेच उपमहापौरपदासाठी वडेट्टीवार समर्थक वसंत देशमुख यांनी उमेदवारी अर्ज दाखल केला. त्यामुळे काँग्रेसमधील दोन महत्त्वाची पदे एकाच गटाकडे गेल्याची भावना धानोरकर समर्थकांमध्ये निर्माण झाली. गटनेता निवडीबाबत प्रदेशाध्यक्षांचा निर्णय अंतिम मानण्यात आला असला, तरी स्थानिक पातळीवरील नाराजी कायम राहिल्याचे आता स्पष्ट झाले आहे.
अंतर्गत संघर्षाचा भाजपला लाभ
चंद्रपूर महापालिकेत काँग्रेसचे २७ नगरसेवक असूनही पक्षाला महापौरपद मिळविता आले नाही. पक्षातील गटबाजी आणि अंतर्गत संघर्षाचा फायदा भाजपने उचलल्याची चर्चा राजकीय वर्तुळात आहे. काँग्रेसकडे संख्याबळ बहुमताच्या जवळ असतानाही भाजपचा महापौर निवडून आला. या घडामोडींमध्ये राज्याचे माजी मंत्री सुधीर मुनगंटीवार यांनी प्रभावी राजकीय रणनीती आखत परिस्थितीचा लाभ घेतल्याचे काँग्रेसमधीलच काही नेत्यांचे मत आहे. आता गटनेता बदलाच्या नव्या मागणीमुळे चंद्रपूर काँग्रेसमधील सत्तासंघर्ष पुन्हा ऐरणीवर आला असून पक्ष नेतृत्व या वादावर काय भूमिका घेते, याकडे राजकीय वर्तुळाचे लक्ष लागले आहे.
