नागपूर : उद्धव ठाकरे आणि राज ठाकरे यांची बहुचर्चित विजयी सभा मुंबईत पार पडली. अपेक्षेप्रमाणे ती ग्रॅण्ड सभा झाली. ठाकरे शैलीत दोन्ही ठाकरे बंधूनी महायुती सरकावर टीका केली. त्यावर भाजपकडून प्रतिक्रिया व्यक्त होऊ लागल्या. माजी प्रदेशाध्यक्ष चंद्रशेखर बावनकुळे यानी एक्सवर त्यांची प्रतिक्रिया दिली.

बावनकुळे म्हणतात ” मराठीच्या गोंडस नावाखाली आज उद्धव ठाकरे यांनी वरळीत सत्ता गेल्याचं शोकगीत गायलं. पण मुख्यमंत्री असताना 2022 मध्ये पहिलीपासून हिंदी सक्तीचा अहवाल का स्वीकारला, याचं उत्तर त्यांनी दिलंच नाही. ‘मराठी भाषा’ ही केवळ भावनांमध्ये उभी राहणारी अस्मिता नाहीतर ती धोरणात दिसली पाहिजे. पण तुम्ही मुंबईत सत्तेत असताना मराठी माणसाला हद्दपार केलं आणि आता सत्ता मिळवण्यासाठी पुन्हा मराठीवर बेगडी प्रेम करत आहात. उद्धव ठाकरेंच्या भाषणातून स्पष्ट होतंय की, त्यांचा खरा अजेंडा ‘म’ म्हणजे ‘मराठी’ नाही, तर ‘म’ म्हणजे ‘महापालिका’ आहे! यांचं मराठीप्रेम म्हणजे निवडणुका जवळ आल्या की आठवण येणारी राजकीय नौटंकी आहे. जनतेनं आता हा दुटप्पीपणा ओळखला आहे.”