पंचायत ते पार्लियामेंट आणि तलाठी ते मुख्य सचिव… संपूर्ण यंत्रणा सतर्क; महसूल मंत्री म्हणतात, “परिस्थिती कितीही गंभीर असली तरी…”

दिवाळीपूर्वी आर्थिक मदत

चंद्रशेखर बावनकुळे म्हणाले, शेतकऱ्यांच्या पिकांचे अचूक पंचनामे पूर्ण झाल्यावर ट्रिगर १ व ट्रिगर २ नुसार केंद्र, राज्य शासन आणि पीक विमा कंपन्यांमार्फत अधिकाधिक मदत दिली जाईल. दिवाळीपूर्वी शेतकऱ्यांना आर्थिक मदत देण्याबाबत सरकार अत्यंत सकारात्मक आहे. केंद्राच्या मदतीची वाट न पाहता राज्य सरकार तातडीने पावले उचलत आहे. केंद्राने प्रस्तावाऐवजी थेट आपली पाहणी चमू पाठवण्याचा निर्णय घेतला आहे. त्यामुळे ग्राम महसूल अधिकारी, कृषी अधिकारी आणि ग्रामसेवकांनी स्वतः शेतावर जाऊन अचूक पंचनामे करावेत, त्यावर शेतकऱ्याची स्वाक्षरी घ्यावी, असे निर्देश देण्यात आले आहेत.

बँक व सावकारांच्या तगाद्यावर बंदी

कर्जाचा हप्ता थकला तरी कोणत्याही बँकेने किंवा खासगी सावकाराने शेतकऱ्यांना त्रास देऊ नये. तसेच खासगी सावकारांनी शेतकऱ्यांना वेठीस धरू नये. ज्या शेतकऱ्यांना कर्जमाफी झाली आहे मात्र वारसांची नोंद न झाल्यामुळे लाभ मिळाला नाही, त्यांच्या वारस नोंदी तातडीने पूर्ण करून घेण्याच्या सूचना देण्यात आल्या आहेत, असेही बावनकुळे यांनी स्पष्ट केले.

उपाययोजनाबाबत अधिकाऱ्यांना सूचना

दुष्काळाच्या परिस्थितीची अकोला जिल्ह्यातील येवता आणि बाळापूर तालुक्यातील मानकी देगाव येथील शेतकऱ्यांच्या बांधावर जाऊन पाहणी केली. तर पारस येथे लोकांची निवेदने स्वीकारली. आचारसंहिता असल्याने बैठक न घेता यावेळी त्यांनी अधिकाऱ्यांशी चर्चा करत दुष्काळ परिस्थितीत पुढील काळात घ्यावयाची काळजी आणि नियोजन याबाबत सूचना दिल्या आहेत. यावेळी महसूल मंत्र्यांकडे शेतकऱ्यांनी आपल्या व्यथा-वेदना मांडल्या आहेत. महसूल मंत्र्यांनी त्या जाणून घेतल्या.