मुख्यमंत्र्यांचे मामेभाऊ बिनविरोध; चिखलदऱ्यात काँग्रेसच्या उमेदवारासह नऊ जणांची माघार

आज काँग्रेसचे उमेदवार शेख इर्शाद शेख जमील तसेच नथ्थू खडके आणि नऊ उमेदवारांनी आपली उमेदवारी मागे घेतल्याने आल्हाद कलोती यांची अविरोध निवड झाली आहे.

Written by लोकसत्ता टीम

अमरावती

November 20, 2025 14:22 IST

cm Devendra Fadnavis relatives Alhad Kaloti wins unopposed Chikhaldara Municipality Election

मुख्यमंत्र्यांचे मामेभाऊ बिनविरोध (छायाचित्र:लोकसत्ता टीम)

अमरावती : नगरपालिकेच्या निवडणुकीत राजकीय वातावरण तापले आहे. सर्वत्र चढाओढीचे राजकारण पहायला मिळत आहे. एकीकडे, नेते बंडखोरांची मनधरणी करताना दिसत आहेत, तर दुसरीकडे, निवडणूक अविरोध व्हावी, असा प्रयत्नही केला जात आहे. चिखलदरा नगरपालिकेची निवडणूक यावेळी लक्षवेधी ठरली आहे. या निवडणुकीत मुख्यमंत्री देवेंद्र फडणवीस यांचे मामेभाऊ आल्हाद कलोती हे नगरसेवकपदाचे उमेदवार होते. त्यामुळे या निवडणुकीकडे अनेकांचे लक्ष लागले होते. कलोती कुटुंबीयांसाठी ही निवडणूक प्रतिष्ठेची ठरली होती.

दरम्यान, आल्हाद कलोती यांच्या प्रभागातून रिंगणात असलेल्या काँग्रेसच्या उमेदवारासह नऊ उमेदवारांनी निवडणुकीच्या रिंगणातून माघार घेतल्याने आल्हाद कलोती यांच्या अविरोध निवडीचा मार्ग मोकळा झाला आहे.

चिखलदरा नगरपालिकेच्या निवडणुकीसाठी मोठी राजकीय उलथापालथ झाली आहे. काही दिवसांपुर्वी राष्ट्रवादी काँग्रेस पक्षाचे (अजित पवार गट) चिखलदरा येथील नेते आणि तीन वेळा नगराध्यक्ष राहिलेले राजेंद्रसिंह सोमवंशी यांनी १५ माजी नगरसेवकांसह भाजपमध्ये प्रवेश केला. राजेंद्रसिंह सोमवंशी यांना भाजपतर्फे नगराध्यक्षपदाची उमेदवारी जाहीर केली आहे. त्यामुळे ही निवडणूक सोमवंशी यांच्यासाठी देखील प्रतिष्ठेची बनली आहे.

हेही वाचा

Ladki Bahin Yojana : मुख्यमंत्र्यांच्या ९५ हजार लाडक्या बहिणी संकटात; आता बहिणी म्हणतात, देवाभाऊ आम्हाला न्याय द्या!

दरम्यान, आज काँग्रेसचे उमेदवार शेख इर्शाद शेख जमील तसेच नथ्थू खडके आणि नऊ उमेदवारांनी आपली उमेदवारी मागे घेतल्याने आल्हाद कलोती यांची अविरोध निवड झाली आहे. ही सर्वांसाठी आनंदाची बातमी आहे. मुख्यमंत्री देवेंद्र फडणवीस यांच्या नेतृत्वावर विश्वास ठेवून सर्व उमेदवारांनी माघार घेणे पसंत केले. हा दूरदृष्टीचा विजय आहे, असे युवा स्वाभिमान पक्षाचे अध्यक्ष आमदार रवी राणा यांनी सांगितले.

आल्हाद कलोती यांच्या अविरोध निवडीबद्दल आनंद व्यक्त करताना रवी राणा यांनी चिखलदऱ्याच्या विकासाचा थेट संबंध मुख्यमंत्र्यांच्या आवडीशी जोडला. रवी राणा म्हणाले, चिखलदरा हे देवेंद्र फडणवीस यांचे आवडते आणि आपुलकीचे ‘हिल स्टेशन’ आहे. आल्हाद कलोती निवडून आल्याने येथील विकासाचे चित्र पूर्णपणे बदलणार आहे. कलोती परिवाराने अंध विद्यालय, शैक्षणिक क्षेत्र, तसेच गवळी, आदिवासी, ओबीसी व कलार समाजासाठी केलेल्या भरीव कार्याचा वारसा आल्हाद कलोती पुढे नेत आहेत. ‘स्काय वॉक’, पर्यटन विकास, रस्ते सुविधा, पिण्याच्या पाण्याचे प्रकल्प आणि विद्युत प्रकल्पांसारखे मोठे प्रकल्प कलोती यांच्यामुळेच मार्गी लागतील.

दरम्यान, मुख्यमंत्री देवेंद्र फडणवीस यांनी आमदार रवी राणा यांच्याशी फोनवरून संपर्क साधून त्यांना शुभेच्छा दिल्या. यावेळी नगराध्यक्षपदाचे उमेदवार राजेंद्रसिंह सोमवंशी आणि आल्हाद कलोती उपस्थित होते.