Summer Special Train 2026: उन्हाळ्याच्या सुट्ट्यांमध्ये थेट उत्तर-दक्षिण भारताला जोडणारी विशेष रेल्वे धावणार; कोणत्या गाड्यांना मिळाली मुदतवाढ?

विशेष गाडीच्या प्रत्येकी नऊ फेऱ्या होणार

गाडी क्रमांक ०६१८१ कोयंबतूर–जयपूर साप्ताहिक एक्सप्रेस विशेष ही गाडी दर गुरुवारी कोयंबतूर येथून पहाटे ०२.३० वाजता सुटेल व शनिवारी दुपारी १३.२५ वाजता जयपूर येथे पोहोचेल. या कालावधीत एकूण ९ फेऱ्या चालविण्यात येणार आहेत. परतीच्या प्रवासात गाडी क्रमांक ०६१८२ जयपूर–कोयंबतूर साप्ताहिक एक्सप्रेस विशेष ही गाडी १२ एप्रिल ते ०७ जून या कालावधीत दर रविवारी रात्री २२.०५ वाजता जयपूर येथून सुटेल व बुधवारी सकाळी ०८.३० वाजता कोयंबतूर येथे पोहोचेल. या गाडीच्या देखील ९ फेऱ्या चालविण्यात येणार आहेत. या विशेष गाडीमध्ये एकूण २० एलएचबी डबे असतील, ज्यामध्ये १८ वातानुकूलित थ्री-टियर डबे व २ लगेज-कम-ब्रेक व्हॅनचा समावेश आहे. ही गाडी विद्युत इंजिनाद्वारे चालविण्यात येईल.

राजस्थान, गुजरात, तेलंगणा आणि तामिळनाडू राज्यांशी थेट रेल्वेने संपर्क

ही गाडी तिरुप्पूर, इरोड, सालेम, कटपडी, रेणीगुंटा, काचीगुडा, निजामाबाद, बासर, मुदखेड, नांदेड, पूर्णा, हिंगोली, वाशीम, अकोला, भुसावळ, जळगाव, नंदुरबार, उधना, वडोदरा, गोधरा, रतलाम, नीमच, चीतौरगढ , अजमेर मार्गे धावेल. नांदेड विभागात ही गाडी मुदखेड, नांदेड, पूर्णा, हिंगोली, वाशीम आणि अकोला या स्थानकांवर थांबणार असून, या भागातील प्रवाशांना राजस्थान, गुजरात, तेलंगणा आणि तामिळनाडू राज्यांशी थेट रेल्वे संपर्क उपलब्ध होणार आहे.

अकोला – तिरुपती विशेष गाडीला मुदतवाढ

प्रवाशांची वाढती गर्दी लक्षात घेता तसेच प्रवाशांना अधिक प्रवास सुविधा उपलब्ध करून देण्यासाठी दक्षिण मध्य रेल्वे प्रशासनाने विशेष गाड्यांची एक फेरी वाढविण्याच्या निर्णय घेतला आहे. या विशेष गाड्या विद्यमान थांबे, वेळापत्रकासह चालवल्या जाणार आहेत. गाडी क्रमांक ०७६०६ अकोला-तिरुपती विशेष गाडी रविवारी धावणार असून तिची सेवा १२ एप्रिलपर्यंत वाढविण्यात आली आहे.