कोलंबिया निवडणूक : आंतरराष्ट्रीय निरीक्षक पथकात महाराष्ट्रातील ‘या’ पाच जणांचा समावेश

कोलंबियात होणाऱ्या निवडणुकांसाठी एक पथक कोलंबियाला जाणार असून यात पाच अधिकाऱ्यांचा समावेश आहे. विशेष म्हणजे या पथकातील पाचही अधिकारी महाराष्ट्रातील आहेत. ८ मार्चला कोलंबियात निवडणूक होणार आहे. या निवडणुकीच्या पाहणीसाठी या पथकाला पाठविण्याचा निर्णय भारत निवडणूक आयोगाने घेतला आहे. निवडणूक उत्कृष्टतेसाठी जागतिक सहभाग उपक्रमांतर्गत हे पथक पाठविण्यात येत आहे. भारतीय निवडणूक व्यवस्थेचा अनुभव जागतिक स्तरावर पोहोचविणे, तसेच कोलंबियातील निवडणूक प्रक्रियेचे निरीक्षण करून सर्वोत्तम पद्धतींचा अभ्यास करणे, हे उद्दिष्ट असल्याचे सांगण्यात येते.

महाराष्ट्राचे मुख्य निवडणूक अधिकारी चोकलिंगम सेथुरामन यांच्या नेतृत्त्वाखालील पाच सदस्यीय पथक ६ ते १० मार्चपर्यंत कोलंबियाच्या दौऱ्यावर राहणार आहे. यात आशीर्वाद कुमार (जिल्हा निवडणूक अधिकारी तथा जिल्हाधिकारी, सोलापूर), मनोहर रामचंद्र पारकर (संयुक्त मुख्य निवडणूक अधिकारी तथा उपसचिव), प्रियेश महाजन ( उपविभागीय अधिकारी,रामटेक,नागपूर), सागर शिर्के (बूथ लेव्हल अधिकारी, नाशिक) यांचा समावेश आहे. हे पथक कोलंबियातील निवडणूक प्रक्रियेचा अभ्यास करतील. कशा पद्धतीने निवडणूक होते, मतदान प्रक्रिया, मतदार यादी, सुरक्षा व्यवस्था, मतमोजणी आदींचा अभ्यास करतील. त्यांचा अनुभवही भारत निवडणूक आयोगाकडे सादर करतील. त्याच प्रमाणे भारतातील निवडणूक प्रक्रियेची माहिती तेथील अधिकाऱ्यांना देतील. या पथकातील पाचही अधिकारी महाराष्ट्रातील आहेत. त्यामुळे महाराष्ट्रासाठी ही गौरवाची बाब आहे.