भंडारा : बागेश्वर धामचे प्रमुख धीरेंद्र कृष्ण शास्त्री हे मागील काही दिवसांपासून वादग्रस्त विधानांमुळे सतत चर्चेत आहेत. काही दिवसांपूर्वी छत्रपती शिवाजी महाराज यांच्याबाबत केलेल्या वक्तव्यामुळे राज्यभरातून तीव्र संताप व्यक्त करण्यात आला होता. विविध सामाजिक व राजकीय संघटनांनी त्यांच्या वक्तव्याचा निषेध करत त्यांच्यावर गुन्हा दाखल करण्याची मागणी केली होती. या पार्श्वभूमीवर भंडारा येथे घडलेल्या नव्या घटनेमुळे पुन्हा एकदा वादाला तोंड फुटले आहे.
भंडाऱ्यात धावती भेट..
प्राप्त माहितीनुसार, दोन दिवसांपूर्वी नागपूर येथे धीरेंद्र कृष्ण शास्त्री यांच्या कार्यक्रमाचे आयोजन करण्यात आले होते. त्यानंतर ते भंडारा जिल्ह्यातील मोहाडी येथे स्नेह भेटीसाठी आले. परवा मध्यरात्रीच्या सुमारास ते भंडारा शहरातील शास्त्री चौकात पोहोचले. त्यांच्या आगमनाची माहिती मिळताच मोठ्या संख्येने भक्तांनी गर्दी केली. परिस्थिती नियंत्रणात ठेवण्यासाठी पोलिसांनी कडक बंदोबस्त तैनात केला होता.
वादाचा केंद्रबिंदू..
या भेटीदरम्यान काही महिला मंडळी आणि हिंदुत्ववादी संघटनेने छत्रपती शिवाजी महाराज यांची प्रतिमा भेट म्हणून धीरेंद्र शास्त्री यांना दिली. शास्त्री यांनी ती प्रतिमा स्वीकारली; मात्र त्यांना महाराजांची प्रतिमा आदरपूर्वक ठेवता आली नाही अशी चर्चा आता रंगू लागली आहे त्याचे कारण म्हणजे छत्रपती शिवरायांची प्रतिमा वाहनात ठेवताना उलट्या अवस्थेत ठेवली गेल्याचे समोर आले. या घटनेचा फोटो सोशल मीडियावर मोठ्या प्रमाणात व्हायरल झाला असून, त्यावरून विविध स्तरांतून तीव्र प्रतिक्रिया उमटू लागल्या आहेत. “ही चूक होती की अनादर?” असा प्रश्न आता उपस्थित केला जात आहे.
मागील वक्तव्यामुळे आधीच पेटलेला वाद.
याआधीही धीरेंद्र कृष्ण शास्त्री यांनी छत्रपती शिवाजी महाराज यांच्याबाबत केलेल्या वक्तव्यामुळे मोठा वाद निर्माण झाला होता. त्यांच्या विधानाला अनेकांनी ऐतिहासिक संदर्भहीन आणि अवमानकारक ठरवत निषेध नोंदवला होता. राज्यातील अनेक ठिकाणी आंदोलने झाली, तसेच काही संघटनांनी कायदेशीर कारवाईची मागणीही केली होती. त्यामुळे भंडाऱ्यातील नव्या घटनेने या वादाला अधिकच खतपाणी घातल्याचे दिसत आहे.
मराठा समाजाकडून संताप; संवेदनशीलतेची अपेक्षा..
या घटनेनंतर मराठा समाजातील काही प्रतिष्ठित नागरिकांनी तीव्र नाराजी व्यक्त केली आहे. “छत्रपतींच्या प्रतिमेबाबत अधिक आदर आणि संवेदनशीलता अपेक्षित होती,” अशी प्रतिक्रिया त्यांनी दिली. वारंवार अशा घटना घडत असल्याने समाजात नाराजी वाढत असल्याचेही त्यांनी नमूद केले.
समर्थन आणि विरोध मतभेद तीव्र..
दरम्यान, काही जणांनी ही घटना अनवधानाने घडलेली चूक असल्याचे सांगत संयम बाळगण्याचे आवाहन केले आहे. तर काही संघटनांनी मात्र कठोर भूमिका घेत निषेध व्यक्त केला आहे. सोशल मीडियावर या घटनेची जोरदार चर्चा सुरू असून, समर्थक आणि विरोधक यांच्यात स्पष्ट मतभेद दिसून येत आहेत.
पुढील भूमिकेकडे सर्वांचे लक्ष..
एकंदरीत, धीरेंद्र कृष्ण शास्त्री यांच्याभोवतीचे वाद थांबण्याची चिन्हे दिसत नाहीत.भंडाऱ्यातील ‘शिवप्रतिमा’ प्रकरणामुळे पुन्हा एकदा त्यांच्या भूमिकेवर प्रश्नचिन्ह उपस्थित झाले आहे. येत्या काळात ते याबाबत स्पष्टीकरण देणार का, तसेच प्रशासन किंवा संबंधित संघटना कोणती भूमिका घेणार, याकडे सर्वांचे लक्ष लागले आहे.
