आरक्षित रेल्वे तिकीट घरीच विसरलात? घाबरू नका; रेल्वेकडे आहे ‘ही’ पर्यायी व्यवस्था

काउंटरवरून काढलेल्या तिकिटांनाच लागू

रेल्वे प्रशासनाच्या माहितीनुसार, ही सुविधा केवळ रेल्वे आरक्षण काउंटर (पीआरएस) वरून जारी करण्यात आलेल्या मूळ आरक्षित तिकिटांसाठी लागू आहे. प्रवासादरम्यान तिकीट सोबत नसल्याचे लक्षात येताच संबंधित प्रवाशाने तत्काळ गाडीतील तिकीट तपासनीस (टीटीई) यांना याची माहिती द्यावी. त्याचवेळी प्रवाशाच्या नातेवाईकाने किंवा अधिकृत प्रतिनिधीने मूळ तिकीट संबंधित प्रस्थान स्थानकाच्या स्टेशन मास्टरकडे सादर करणे आवश्यक आहे.

स्टेशन मास्टरकडून पुढील स्थानकाला माहिती

मूळ तिकिटाची पडताळणी झाल्यानंतर स्टेशन मास्टर रेल्वेच्या नियमानुसार संबंधित पुढील स्थानकाला आवश्यक माहिती पाठवतात. त्यानंतर प्राप्त माहितीनुसार रेल्वे अधिकारी आवश्यक कार्यवाही करून संबंधित प्रवाशाला पुढील प्रवासासाठी सहकार्य करतात. त्यामुळे केवळ तिकीट विसरल्यामुळे प्रवास अर्धवट सोडण्याची वेळ येत नाही.

ई-तिकिटांसाठी ही सुविधा नाही

ही सुविधा ऑनलाइन आरक्षित करण्यात आलेल्या आयआरसीटीसीच्या ई-तिकिटांसाठी लागू होत नाही. ई-तिकिटांच्या बाबतीत स्वतंत्र नियम लागू असल्याने प्रवाशांनी डिजिटल तिकीट आणि वैध ओळखपत्र सोबत ठेवणे आवश्यक आहे.

प्रवासापूर्वी कागदपत्रांची खात्री करा

प्रवासाला निघण्यापूर्वी तिकीट, ओळखपत्र आणि इतर आवश्यक कागदपत्रे सोबत असल्याची खात्री करून घ्यावी, असे आवाहन रेल्वे प्रशासनाने केले आहे. तरीही काउंटरवरून काढलेले तिकीट चुकून घरी राहिल्यास घाबरून न जाता रेल्वेच्या नियमानुसार उपलब्ध पर्यायी प्रक्रियेचा अवलंब करावा, असेही प्रशासनाने स्पष्ट केले आहे.

१३९ हेल्पलाइनवर मिळेल माहिती

प्रवाशांच्या सोयीसाठी रेल्वेची १३९ ही हेल्पलाइन चोवीस तास कार्यरत आहे. प्रवासाशी संबंधित माहिती, मार्गदर्शन किंवा मदतीसाठी या क्रमांकावर संपर्क साधता येतो. योग्य माहिती, वेळेवरची कार्यवाही आणि रेल्वे नियमांचे पालन केल्यास प्रवासातील अनावश्यक अडचणी व तणाव टाळता येतात, असा संदेश रेल्वे प्रशासनाने दिला आहे.